MANILA , Sept. 29 (PIA) –- Ang World Bank ug ang kagamhanan sa Pilipinas mipirma ug bag-ong loan aron gastohon sa programa sa kagamhanan pagpauswag sa pagpangandam batok sa mga kalamidad ug katalagman ingon man pagkunhod sa kasakit nga maagoman sa mga Pilipino tungod sa epekto niining mga kalamidad.
Sa usa ka pamahayag, ang maong tigpahulam nga nakabase sa Washington miingon nga ang bag-ong kasabotan sa paghulam naghatag sa $500 milyon---gitawag kini ug Disaster Risk Management Development Policy Loan with Catastrophe Deferred Drawdown Option (CAT-DDO), nga daling magamit sa kagamhanan alang sa emergency relief, recovery ug reconstruction tapos sa usa ka dakong kalamidad nga modangat.
Matod pa ni Secretary Cesar Purisima sa Department of Finance, nga isip usa ka dali nga kakuhaan sa pondo, ang CAT-DDO magahatag sa kagamhanan ug usa ka bridge financing samtang ang ubang pondo sama sa bilateral aid ug concessional funding giandam pa tapos sa usa ka dakong panghitabo nga kalamidad.
Kining maong pasilidad kritikal kayo tungod kay ang Pilipinas usa sa mga nasod sa tibuok kalibotan nga dali kaayong maapektohan sa kalamidad.
“Sa panahon sa kalamidad, nag-atubang kita sa dakong panginahanglan sa paghatag ug emergency assistance ngadto sa mga biktima ug aron pagtukod pag-usab sa mga kalsada, ospital, eskwelahan, irigasyon, linya sa kuryente ug tubig, ug uban pang importanteng imprastraktura,” si Purisima miingon.
“Ang CAT-DDO naghatag kanato ug pondo alang sa madaliang relief, recovery ug reconstruction, busa makunhoran ang social ug economic dislocation sa mga apektadong komunidad, labi na ang mga kabos nga maoy labing mahiagom sa mga kalamidad,” dugang ni Purisima.
Si Bert Hofman, World Bank Country Director for the Philippines miingon nga ang CAT-DDO nagsuporta sa integrated framework alang sa disaster risk reduction and management ubos sa Disaster Risk Reduction and Management Act ug Strategic National Action Plan (SNAP) alang sa Disaster Risk Reduction nga gimugna niadtong tuig 2010.
“Ang Pilipinas naghimo ug usa ka proactive approach sa pagdumala sa mga kalamidad pinaagi sa paglakip sa risk reduction diha sa development planning, pagpauswag sa institutional capacity sa kagamhanan ug pagkunhod sa fiscal exposure sa mga kalamidad,” pahayag ni Hofman. (ALT-PIA9/Zambo Sur)
