MANILA , Sept. 20 (PIA) –- Si Education Secretary Armin Luistro miingon kagahapong adlawa nga ang administrasyon ni Presidente Benigno C. Aquino III misaad nga tubagon ang kakulangon sa classrooms pinaagi sa pagtukod ug 41,000 nga lawak klasehan sa tuig 2012.
“Atong tubagon ang nagdugang nga kakulangon sa matag tuig ug alang sa 2012 nga budget, magtukod kita ug 41,000 classrooms,” si Luistro miingon atol sa Senate hearing kalabot sa proposed P191 bilyon nga budget sa DepEd sunod tuig.
Matod pa nga sa P18.2 bilyon nga gitagana alang sa konstruksiyon ug pag-renovate sa school buildings sa 2012, ang P5 bilyon ipahigayon pinaagi sa public ug private partnership o kining gitawag nga PPP program.
Ang DepEd mipahayag nga ilang tubagon ang lima ka nag-unang kakulangon sama sa magtutudlo, textbooks, mga bangko, ingon man ang water ug sanitation facilities.
“Sa Disyembre 2012, kadaghanan sa mga kakulangon sa mga milabay’ng tuig masulbad na. Matag tuig, adunay pag-repair sa mga classrooms. Ang atong ginaapas mao kadtong mga tuig nga napasagdan,” si Luistro miingon.
Samtang sa laing bahin, nanawagan si Senator Franklin Drilon sa Commission on Audit nga susihon ang dakong kalainan tali sa cost-effective schoolbuilding program nga gipasiugdahan sa senador sa pakig-kumboya sa pribadong sector ug sa DepEd.
“Kinahanglan susihon kini sa COA…adunay basehan alang sa usa ka COA inquiry,” miingon si Drilon nga maoy chairman sa Finance Committee, sa usa ka interview.
Si Drilon nagkanayon nga adunay basehan alang sa usa ka state audit agency aron pagsusi sa costing sa school building program sa DepEd, ug matod pa nga ang konstruksiyon sa matag classroom pinaagi sa Drilon-Federation of Filipino-Chinese Chambers of Commerce and Industry Inc. (FFCCCII) mas barato ug katunga sa presyo kung ikumpara sa mga classrooms nga gitukod sa gobyerno.
Sumala pa, pinaagi ning pagtambayayong sa pribadong sector, ang cost effective schoolbuildings magkantidad lamang ug P650,000 matag building nga adunay 2 ka classrooms, samtang ang maong kantidad magtukod lamang ug usa ka classroom ubos sa DepEd.
Ang DepEd naglaraw usab sa pagtubag sa kakulangon sa kuryente sa may 9,000 pampublikong tulonghaan sa tibuok nasod. (ALT-PIA9/Zambo Sur)
