ni Franklin P. Gumapon
DIPOLOG CITY, June 5 (PIA) - - Subay sa tinguha sa kagamhanang
Aquino nga ayuhon sa pagamit ang enerhiya, milagda ang Department of Budget and
Management (DBM) ug usa ka Memorandum of Understanding (MOU) tali sa Department
of Energy (DOE), Climate Change Commission (CCC) ug Bank of the Philippine
Islands (BPI) aron pagpadas-ug sa usa ka energy-efficiency initiative sa may
lima ka edipisyo sulod sa Malakanyang.
Ang mga edipisyo nga ipailalom sa greening mao ang Malacañang
Palace, DBM Building II, Mabini Hall, Presidential Management Staff Building u
gang New Executive Building.
Gipasabot ni Kalihim Florencio Abad sa DBM nga agig pagtuman sa
saad ni Pangulong Aquino sa katawhan nga himoon sa kagamhanan ang pagpatuman ug
mga lakang alang maluntarong pagamit sa enerhiya ug pagpamenos sa epekto sa
climate change, ang greening program nagtinguha nga gamiton sa ensakto ang
enerhiya aron makadaginot ug pundo nga magamit unya sa mga mahihungdanong
proyekto.
Ubos sa maong kasabutan, ang DBM maoy modumala sa bid-and-award
process ug ang CCC maoy tigdumala sa pagpalunhaw sa mga edipisyo sulod sa
Malakanyang.
Ang papel sa DOE mao ang paghatag sa technical assistance ug ang
BPI maoy molugway ug pahulam ngadto sa mga energy service companies nga adunay
kontrata sa mga buhatan sa gobyerno.
Saysay pa ni Abad nga ang bag-ong DBM building sa Manila
malamposong nakatagbo sa standards alang sa energy efficiency sumala sa
pagsubay nga gihimo.
Gikalipay ni Abad ang resulta sa gihimong pagsubay ug siya nagto-o
nga kon ang tanang edipisyo sa DBM mamahimong energy-efficiency centers, lagmit
mosuhid usab ang ubang mga buhatan sa kagamhanan.
Gipasabot sa kalihim nga
ang pagpakig-asdang batok climate change nagkinangalan sa commitment sa tanan
ug dili sa pipila lamang. (FPG/PCOO/PIA-Zamboanga del Norte)
