ni Alfonso T. Ruda
DIPOLOG CITY, MAR. 4(PIA)---Si Presidente Benigno Aquino III subling mipalanog sa iyang hugtanong tinguha nga tapuson na ang armadong panag-engkuwentro tali sa mga sundalo sa gobyerno ug sa mga walhong grupo, dungan ang paghatag ug punto sa nagpadayong pagpakig-negosasyon sa gobyerno uban sa mga rebelding grupo.
Sa iyang pagpakigpulong atol sa Ceremonial Switch-On sa 2.1 Megawatt Linao Cawayan Mini Hydro Power Plant (LCMHPP)-Lower Cascade Facility ug 45 ka sitios ilalom sa Sitio Electrification Program, gi-awhag ni Presidente Aquino ang mga walhong grupo nga ipaubos na nila ang ilang armas ug moadto sa negotiating table aron ipadayon ang pagpakig-negosasyon sa gobyerno ug tukion ang solusyon nga moptapos sa pila na ka dekada gubat dinhi sa nasod.
“Mobalik si Joma kung duna nay klarong istoryahan ug ang tumoy niana siyempre ambisyon pod nato na. Di na ta magbakbakan pinaagi sa pusil, hinuon magbakbakan ta pinaagi sa debate, dayon naa tay eleksyon, ug kon kinsa ang magpatigbabaw sa eleksyon, sila ang magrepresentar sa kinabag-an nga magdisisyon alang sa tanan,” matod pa sa Presidente.
Gipanghimakak usab sa Hepe Ehikutibo ang taho nga kasamtangang nakipagnegosasyon ang gobyerno sa Communist Party of the Philippines para pabalikon dinhi sa Pilipinas ang founder sa CPP nga si Jose Maria Sison.
Matod pa ni Presidente Aquino, kon mahitabong mabalik dinhi sa nasod si Sison, maghatag kini ug dalan padulong sa pagpirma sa kasabutan sa kalinaw tali sa Kagamhanan sa Pilipinas ug sa grupo ni Sison.
Ang labing ulahing taho miangkon nga nabalik na dinhi sa Pilipinas si Sison, gamit ang alyas nga Renato Malaya niadtong Enero 20 sakay sa ayroplano nga didto mitugpa sa Diosdado Macapagal International Airport sa Pampanga.
Gipanghimakak usab sa militar ang maong report uban ang pag-ingon nga ang maong sayop nga impormasyon nagumikan lamang sa mikatap nga mga text messages. (ATR/PCOO/PIA-9-Zambo Norte)
