Ni Alma L. Tingcang
PAGADIAN CITY, March 5 (PIA) - - Ang administrasyong Aquino nagpadayon pagpangita ug solusyon nga motubag sa nagkataas nga presyo sa lana ug liquefied pertroleum gas kun LPG aron pagkunhod sa impact niini diha sa transport sector ingon man sa mga ordinaryong konsumante, kini sumala pa sa spokesperson sa Palasyo.
Sa usa ka radio interview niadtong Sabado sa dzRB Radyo ng Bayan, si Deputy Presidential Spokesperson Abigail Valte miingon nga ang kagamhanan nagpadayon pagbantay ug pagtuki sa lihok sa presyo sa lana aron pagpangita ug solusyon nga matabangan ang publiko.
Si Valte miingon nga kinahanglan masabtan sa katawhan nga ang paglihok sa presyo sa lana dili usa ka problemang lokal sa pilipinas kundili lakip na usab sa ubang nasod. Ug tungod kay ang pagnegosyo sa produktong petrolyo nagsubay sa deregulasyon, kinahanglan atong masabtan nga nagdepende kini sa pwersa sa merkado.
Gitaho usab ni Valte nga ang Department of Energy (DOE) niadtong nakalabay nga semana nagsugod na pagreload sa mga cards ngadto sa mga drivers ug transport operators ubos sa Pantawid Pasada program.
“Nasayod kita nga usa lamang kini sa mga lakang nga gisulayan aron pagtabang sa gobyerno ngadto sa mga jeepney drivers ug operators sa public transport,” si Valte miingon.
Ang Department of Energy ug Department of Transportation and Communication nagpadayon pakigsulti sa mga transport groups aron pagtubag sa ilang mga concerns labi na sa dihang mihulga sila ug usa ka posibleng mass action nga ilang ipahigayon.
Kalabot sa nagkataas nga presyo sa LPG nga miapekto sa mga ordinaryong panimalay, si Valte miingon nga ang Palasyo nagpahigayon ug konsultasyon tali sa ubang mga ahensiya sa kagamhanan aron mohimo ug solusyon sa maong problema.
Sumala pa sa DOE, ang presyo sa lana posibleng motaas na usab sunod semana tungod sa tensiyon kalabot sa ambisyong nuclear sa Iran. Ang United Nations mipahamtang na ug upat ka matang sa penalty o silot ngadto sa Tehran, dugang pa sa silot nga gi-imposar sa United States ug European Union aron pag-undang sa ilang programang nuclear.
Ang international community nahadlok tungod sa kasamtangang nuclear development sa Iran nga nagtumong pagmugna ug atomic weapons, nga gipanghimakak usab sa nasangpit nga nasod. (ALT-PCOO/PIA9/Zambo Sur)
