ni Alfonso T. Ruda
DIPOLOG CITY, MAR.1(PIA)---Mipasalig ang Malakanyang ug patas nga kompetisyon tali sa mga magdudula sa industriya sa tabako ilalom sa gisugyot nga SinTax Law.
Ang pasalig giluwatan sa tigpamaba sa Malakanyang nga si Edwin Lacierda sa gipahigayong regular press briefing sa Malakanyang isip tubag sa isyo nga gipasupot sa pipila ka magbabalaod nga ang gisugyot nga sin tax law maoy makapaluya sa industriya sa tabako.
Gihatagan ug punto ni Lacierda nga ang gisuyot nga kausaban sa istraktura sa sin tax law maoy magwagtang sa mga sagabal sa kompetisyon.
“Ang Sin Tax Reform Pack maoy tipik sa LEDAC (Legislative-Executive Development Advisory Council),” patin-aw pa ni Lacierda. Ang Sin Tax Law nagtugot sa kompetisyon. Sa pagkakaron, ang industriya sa tabako gikontrol lang sa ka dakong nga nagkontrol ug 90 porsiento, ug kini mao ang Philip Morris.”
Gawas sa pagwagtang sa monopoliya sa industriya sa tabako, ang nasangpit nga balaodnon nagtumong usab nga marationalize ang pagkolekta sa sin taxes sa nasod para madugangan ang pondo sa gobyerno.
Naglaum ang gobyerno nga mokita ug 60 bilyones ka pesos matag tuig pinaagi sa pagrationalize sa buhis sa alcohol ug mga produkto sa tabako. Kon wala kining maong balaodnon, gibana-bana sa Department of Finance nga mawad-an ang gobyerno ug 2 ngadto sa 2.4 bilyones ka pesos hangtud sa 2013.(PCOO/ATR/PIA9-Zambo Norte)
