ni Claro A. Lanipa
Pagadian City, Feb. 20 (PIA) – Sa tinguha alang sa angay ug malahutayong kalinaw sa Mindanao, ang kagamhanan miuyon sa kinahanglanon alang sa ‘tinuoray nga otonomiya’ (genuine autonomy) kon diin ang kasamtangan Autonomous Region in Muslim Mindanao (ARMM) wala pa mahatagi. Sa gipahigayong katapusan hugna sa sultihanay tali sa kagamhanan ug sa Moro Islamic Liberation Front (MILF), ang mga detalyes sa maong otonomiya ang gituki pa karon.
Matod pa ni Marvic Leonen, chair Government of the Philippines Panel, nga gimandoan ni Presidente Benigno S. Aquino III sukad sa sinugdanan, ang kasamtangan kagamhanan molihok sumala sa batakan-balaod ug subay sa gitawag parameters of national sovereignty ug territorial integrity.
Sa susamang higayon, samtang ang kagamhanan nakig-negosasyon pa sa MILF, nagduso kini alang sa paglambigit sa tanan stakeholders sulod sa ARMM aron sa pagpatin’aw sa mga tumong, paglingkit ug interes ug sa pag-uyon sa kumon nga matang sa aksyon, miingon si Leonen.
Dugtong pa niya, ang kagamhanan mopadayon sa pagpahigayon ug konsultasyon sa tanan apektadong lumulupyo. Sa pagka-karon 65 ka mga konsultasyon ang gipahigayon. (OPAPP/PIA9/CAL)
