DIPOLOG CITY, FEB. 12(PIA)--- Nagplano karon ang mga kadagkuan sa Philippine National Police nga buhion ug balik ang anti-illegal gambling task force, higpitan ang kampanya sa one-strike-policy ug hukdon ang mg pulis nga nalambigit sa illegal nga sugal ug nagkatap karon sa nagkalain-laing bahin sa nasod.
Sa iyang report nga gisumiti ngadto kang Interior and Local Government Secretary Jesse Robredo niadtong Pebrero 2, 2012, si PNP Chief, Director-General Nicanor Bartolome nagkanayon nga nagpatawag na siya ug miting niadtong Enero 10 sa tanang PNP Directors, Regional Directors, Criminal Investigation and Detection Group ug PNP Intelligence Group, diin iyang gimando nag hugtanong kampanya batok sa tanang matang sa illegal nga sugal , partikularmente ang jueteng.
“Labaw sa tanan, gipahinumdoman usab ang kapulisan nga nagpabilin pang gipatuman ang “One-Strike Policy” sa PNP ug kinahanglan i-implementar kini sumala sa gitakda sa balaod,” matod pa ni Bartolome.
Mahinumdoman, nga niadtong Disyembre 14, 2011, nagsulat si Robredo kang Bartolome ug nangayong i-implementar ang maong kampanya gumikan sa naghitak nga illegal nga sugal sa Northern Luzon, partikularmente sa mga lalawigan sa Ilocos Sur, La Union, ug Pangasinan diin nalambigit ang mga opisyales sa kagamhanang-lokal ug kapulisan.
Base sa report nga gisumiti ni Senior Superintendent Francisco Peñaflor, Senior Police Assistant to the Secretary ug Chairman sa National Police Commission, giingnan ni Sec. Robredo si Bartolome, nga dunay mga tawong naggamit sa ngalan sa DILG sa pagpangyao ug saborno gikan sa mga operators sa jueteng sa rehiyon1.
Gawas sa miting ug pagpahinumdom ni Bartolome sa kapulisan kabahin sa hugtanong kampanya batok sa illegal nga sugal sa mga lugar nga ilang nasakupan, gitaho usab ni Bartolome kang Robredo nga naa na karon sa proseso ang PNP sa pagbuhi ug balik sa Anti-Illegal Gambling Special Task Force nga panguluhan sa Deputy PNP Chief for Operations isip Task force commander.
Sumala pa sa Hepe sa PNP, kini nagkahulugan nga hingusgan sa PNP ang kampanya batok sa illegal nga sugal, ingon man ang paggukod sa mga pulis nga nalambigit niining maong illegal nga kalihokan ug ipakita nga seryoso ang PNP sa kampanya niini ug wad-on ang pagduda nga gipasagdan lang sa mga kadagkuan sa PNP ang ilang mga sakop nga malambigit sa mga illegal nga sugal.(ATR/PIA9-Zambo Norte) .
