Ni Alma L. Tingcang
MANILA, December 16 (PIA) - - Ang nasudnong budget alang sa 2012, nga gipirmahan ni Presidente Benigno Aquino III kagahapon, mao ang pinakasayo nga Government Appropriations Law nga gipirmahan sukad nahibalik ang demokrasya sa Pilipinas niadtong tuig 1986. Sa iyang pakigpulong tapos ang pagpirma, ang presidente miingon nga kining adlawa angay matala sa kasaysayan sa Pilipinas isip pinakauna diha sa 25 ka tuig nga demokrasya sa atong nasod. “Kaganina lang nasaksihan ninyo ang pagpirma sa atong budget, kinasayohan nga pagpirma sa balaod sa tinuig nga budget sukad nabawi nato ang demokrasya niadtong 1986,” ang presidente nagkanayon. “Matuod nga makasaysayan ug makahuluganon kaayo kining adlawa,” dugang pa niya. Ang ubang sayo giaprobahan nga budget sa milabay nga 4 ka presidente mao kining mosunod: Corazon Aquino – December 18, 1986; Fidel ramos – January 6, 1993; Joseph Estrada – December 30, 1998; ug Gloria Arroyo – January 21, 2002. Gipasalamatan ni Presidente Aquino ang mga nagpaluyo ug naningkamot aron pag-andam sa 2012 budget nga sila si: Senate President Juan Ponce Enrile, House Speaker Feliciano Belmonte ug ang Department of Budget and Management. Sa usa ka pamahayag, si Budget Secretary Florencio Abad miingon nga ang sayong pagpirma sa budget nagpasabot lamang nga ma-implementar gilayon sa kagamhanan ang mga programa ug nag-unang infrastructure projects bisan pa sa unang adlaw sa bag-ong tuig. “Lahi kaysa tuig 2011 sa dihang nalangan ang paggasto sa infrastructure, among gitinguha nga masugdan ang tuig 2012 sa usa ka kusganong implementasyon,” si Abad miingon. “Ang dali nga pagpirma sa budget nagpasabot usab nga mapaspasan sa gobyerno ang implementasyon sa mga programa, nga pagasugdan pinaagi sa mga key infrastructure projects. Gipalig-on usab niini ang panaad sa kagamhanan nga mao ang iyang social contract tali sa katawhang Pilipino ug gipatataw ang atong tumong aron mapaneguro ang ekonomikanhong paglambo ug transparent nga paggasto sa kagamhanan,” siya mipahayag. (ALT-PIA9/ZamboSur) |
