Ni Alma L. Tingcang
| Sa usa ka giluwatang pamahayag, si Presidential Spokesperson Edwin Lacierda miingon nga ang pagkunhod sa unemployment rate nagpakita lamang nga ang mga paningkamot sa kagamhanan aron pagmugna ug usa ka kalikopan diin molambo ang pamuhunan nagsugod na pagpamunga. “Sa malig-on nga gikasabotan, nagmugna kini ug 2.1 milyon nga trabaho, sobra katunga sa 1 milyon trabaho nga gimugna niadtong Oktubre sa milabay nga tuig. Alang sa 2011, ang Labor Force Survey nagpakita nga nakamugna kini ug 1.2 milyon nga trabaho,” si Lacierda miingon. “Kining maong natala nga trabaho nagpakita sa usa ka malahutayong pagsalig ug pamuhunan sa atong nasod taliwala sa ekonomikanhong crisis nga nahiagoman sa tanang dapit sa kalibotan. Nagbunga na gayud ang atong mga paningkamot,” dugang pahayag ni Lacierda. Ang kinaulahiang Labor Force Survey nga giluwatan kagahapon nagpakita nga ang unemployment rate sa bulan sa Oktubre mikunhod ngadto sa 6.4% gikan sa 7.1% sa susamang panahon niadtong tuig 2010. Ang National Capital Region mitala sa kinatas-ang unemployment rate diha sa 10.4% samtang ang Autonomous Region in Muslim Mindanao (ARMM) maoy kinaubsan diha sa 2.3%, kini sumala pa sa nasangpit nga survey. “Ang pagmugna ug mga trabaho maoy pinakamalig-on nga pamaagi diin ang kagamhanang Aquino nagmatinumanon sa iyang saad pagbatok sa kalisod ug pagpagahum sa atong mga katawhan,” panapos nga pahayag ni Lacierda. (ALT-PIA9/Zambo Sur) |
