ni Franklin P. Gumapon
DIPOLOG CITY, Dec. 16 (PIA) - - Gipahibalo karong bag-o ni Secretary Corazon Juliano-Soliman sa Department of Social Welfare and Development (DSWD) nga tabangan ang mokabat sa 1.2 milyones ka mga pobreng mag-uuma alang sa ilang kapanginabuhi-an.
Nag-una sa taga-an ug hinabang mao kadtong mga magg-uuma sa lubi, humay, mais, tubo ug kadtong mga molupyo sa kabaybayonan nga naapil sa “Pantawid Pamilyang Pilipino Program” (4P).
Gipasabot ni Soliman nga ang maong programa gituyo pag-mugna arun makaseguro nga ang mga anak sa mga mag-uuma makapadayon pag-eskwela ug makabaton sa kahimsug sa panlawas sulod sa lima ka tuig nga ilang pagpahimulos sa programa sa 4P.
Ubos sa cash-for-work (CFW) nga paagi, ang mga membro sa 4P makapahimulos sa suholan sumala sa gitakda sa regional wage board diha sa ilang pagtrabaho sa irrigation canals, kalsada sa kaumahan, ug mga basakan nga wala ugmara.
Sa laing bahin, ang buhatan sa agrikutura maoy molantaw sa mga dapit katam-nan ug mohatag sa mga ekipo ug ubang panginahanglanon sa uma lakip nga ang mga binag-ong teknolohiya sa pagpananum. (FPG/PIA-Zambonga del Norte)
