ni Alfonso T. Ruda
DIPOLOG CITY, NOV 1(PIA)---Gihigpitan karon sa kapulisan ang seguridad sa sulod ug palibot sa mga sam-ang dinhi sa dakbayan, samtang inanay nang midagsa ang katawhan sa sementeryo nga miduaw sa lubong sa ilang mahal sa kinabuhi ning panahon sa Kalag-Kalag.
Sumala pa ni Supt. Kenneth Mission, hepe sa kapulisan dinhi sa dakbayan sa Dipolog, nagpakatap siya karon ug mga pulis sa sulod ug palibot sa sam-ang dinhi sa dakbayan aron mabantayan ang kaluwasan sa mga moduaw sa lubong sa ilang mga mahal sa kinabuhi.
Ang paghatag ug seguridad sa sementeryo nga gihimo sa Dipolog City Police Office, giabagan usab sa mga elemento gikan sa Zamboanga del Norte Provincial Police Office ug 101ST Infantry Brigade nga nakabase sa del Pilar, Piñan, Zamboanga del Norte.
Gawas niini, nagpakatap usab si Mission ug mga di-unipormadong mga pulis sulod sa sementeryo aron mamonitor kon duna man ugaliy magbinuang o magdala ug mga butang nga unang gidili sa Dipolog City Police Office.
Subli usab nga gipahinumdom ni Mission ang mga butang nga dili nila tugtang dad-on sulod sa sementeryo, sama sa mga mahait nga hinagiban, ilimnong makahubog, ug uban pang butang nga makadisturbo sa pag-ampo sa kadaghanan ingon man ang dili pagdala ug mga alahas ug uban pang mahalon nga butang sulod sa sementeryo.
Mahinumdoman, nga una nang nagpakanaog ug kamanduan ang hepe sa PNP nga si Chief Supt. Nicanor Bartolome nga nagpailalom sa full alert status sa tibuok puwersa sa PNP panahon sa All Saint’s Day.
Mas labi pa usab nga gihigpitan sa mga otoridad ang seguridad human ang nahitabong pagbanhig-patay sa 19 ka mga sundalo didto sa Al-Barka, Basilan; ang pagbanhig-patay usab sa mga sundalo ug pulis didto sa Zamboanga Sibugay; pagboto sa bomba didto sa dakbayan sa Zamboanga ug ang labing ulahi, ang pagdagit sa batan-ng magpapatigayon dinhi sa dakbayan sa Dipolog nga si Frank Oliver Lim niadtong miaging semana, diin hangtud karon, wala pa gihapoy lead ang mga otoridad. (JPA/ATR/PIA9-Zambo Norte).
