by Alma L. Tingcang
MANILA, November 2 (PIA) – Ang administrasyong Aquino gitakdang mogasto ug P3.7 trilyon sulod sa lima (5) ka tuig alang sa mga priority infrastructure ug social projects, kini sumala pa sa National Economic and Development Authority (NEDA).
Si Rolando G. Tungpalan, deputy director-general for Investment Programming sa NEDA mibutyag ngadto sa mga reporters nga ang inisyal nga pondo alang sa Medium Term Philippine Investment Plan (MTPIP )2011-2016 mokabat ngadto sa P4.2 trilyon, lakip niini ang loan assistance alang sa private sector ug small and medium enterprises (SMEs).
Hinuon, si Tungpalan miingon nga ang kagamhanan mogasto sa P3.7 trilyon alang sa gitawag nga “hard and soft investments.”
Ang MTPIP sa administrasyong Aquino mas taas kaysa P2.92 trilyon alang sa tuig 2006-2010 sa nakalabay nga pamunoan.
Ang MTPIP sa nasod nahasubay sa Philippine Development Plan (PDP) 2011-2016. Ubos sa PDP sa kagamhanan, ang gobyerno naglaom sa 7 ngadto sa 8 porsiyento nga annual growth target ingon man pagmugna sa usa ka milyon nga trabaho matag tuig.
“Usa kini ka mas hataas nga panglantaw sa pagtubo kaysa milabay nga dekada ug makab-ot kini pinaagi sa mas dako nga kontribusyon sa physical capital sa GDP growth, ingon man pinaagi sa pagdugang sa total factor productivity alang sa halapad nga pamuhunan sa transport, water, energy ug uban pang infrastructure tugbang sa maayong pangagamhanan,” ang economic blueprint sa atong nasod nagaingon. (ALT-PIA9/Zambo Sur)
