ni Alfonso T. Ruda
DIPOLOG CITY, NOV. 1(PIA)- - Nagpasidaan karon ang mga Obispo sa simbahang Katoliko ngadto sa publiko batok sa pipila ka mga tawong magpaka-aron-ingnong pari nga nagsuroy-suroy sa mga sam-ang panahon sa kalag-kalag.
Matod pa ni Bishop Pedro Arigo, kining maong mga bogus nga pari, magsuroy-suroy sa mga sementeryo, magpahigayon konohay ug blessing rituals sa mga lubong, dayong pangayo ug bayad gikan sa kabanay kon tangtungod sa lubong.
“Kinahanglan nga mag-amping ang publiko ug dili basta-basta mosalig sa mga moduol sa lubong ug magpaka-aron-ingnong pari ug mamendita bugti sa bayad nga kwarta,” matod pa ni Arigo.
Hinuon, sumala pa sa Obispo, sayon lang ang pag-ila sa peke gikan sa matuod nga pari. Kini, pinaagi sa pagpangayo sa iyang celebret – ang identification card nga giisyo sa simbahan ngadto sa usa ka pari.
Aron malikayan ang maong panghitabo, nanawagan karon ang simbahan sa mga otoridad nga magbutang ug mga pulis sa sementeryo aron ma-inspeksyon ang tanang mosulod sa sementeryo ug duna usab dayoy kasumbungan ang publiko kon dunay di-maayong mahitabo sulod sa sementeryo.
Dinhi sa dakbayan sa Dipolog, gipatuman karon sa kapulisan uban ang augmentation force gikan sa Zamboanga del Norte Provincial Police Office ug mga membro sa 101st Infantry Brigade ang higpit nga seguridad sa sulod ug sa palibot sa sementeryo sa dakbayan. (JPA/ATR/PIA9-Zambo Norte)
