ni Franklin P. Gumapon
DIPOLOG CITY,Jan. 24 (PIA) - - Gi-deklarar ni Pangulong Benigno Simeon C. Aquino III ang buwan sa Enero matag tuig nga ‘Philippine Tropical Fabrics Month.’
Pinasikad sa Proclamation No. 313 nga pinirmahan ni Executive Secretary Paquito N. Ochoa Jr. kaniadtong Enero 12, 2012, gipagawas ni Pangulong Aquino ang maong deklarasyon aron mapalambo ang pagamit sa panapton nga ginama sa mga lanut nga makuha lamang dinhi sa nasud.
Sumala pa sa Aktas Republika 9242, nga gitawag ug Philippine Tropical Fabrics Law sa 2004, ang tropical fabrics mao kadtong mga lanut nga gihimong tanud ug panapton gikan sa pinya, abaca, sida ug uban pang matang sa lanut dinhi sa nasud nga gipanghimo nga uniporme sa mga opisyales ug empleyado sa gobyerno.
Subay sa maong deklarasyon sa Palasyo, gisaulog usab karong adlawa ang “Philippine Tropical Fabrics Day” ubos sa pagdumala sa Philippine Textile Research Institute (PTRI) sa buhatan sa Department of Science and Technology (DOST).
Ang tanang fabric producers, textile manufacturers, garments and geotextile companies lakip na ang mga pribadong organisasyon gi-awhag sa pag-salmut sa nahisgutan nga kasaulogan. (FPG/PIA-Zamboanga del Norte).
