ni Franklin P. Gumapon
DIPOLOG CITY, Jan. 24 (PIA) - - Pormal nga gipresentar sa Senado kaniadtong Martes ang nasagop niining resolusyon nga nagdayeg ni Senador Miriam Defensor-Santiago sa pagkapili niini isip maghuhukom sa International Criminal Court (ICC).
Kuyog sa tanang membro sa Senado, gi-presentar ngadto ni Senador Santiago ang Senate Resolution No. 74 sa iyang pagbalik gikan sa sick leave.
Gipanghinaut usab ni Senate president Juan Ponse Enrile nga ipadayun ni Senador Santiago ang iyang kakugi ug maayong agi sa Senado ngadto unya sa ICC.
Si Senador Jinggoy Estrada mao ang nangamahan sa maong resolusyon.
Si Santiago gi-ila nga usa sa mga banggi-itan nga abugado dinhi sa nasud ug napiling maghuhukom sa ICC atol sa ika-10 nga sesyon sa Assembly of States Parties sa New York City kaniadtong Desyembre 13 sa miaging tuig.
Ang pagkapili ni Santiago isip usa sa mga maghuhukom sa ICC maoy unang higayon nga ang usa ka Filipino nahimong huwes sa maong korte ug unang babayeng huwes nga nagagikan sa mga pobreng nasud.
Si Santiago mobiya sa iyang pagka Senador aron molingkod isip huwes sa ICC sulod sa siyam ka tuig.
Kahinumduman nga si Santiago nakakuha’g bag-ong mandatu isip senador atol sa nasudnong piniliay kaniadtong Mayo 10, 2010. Ang iyang termino isip Senador molibkas pa unta unya sa Hunyo 30, 2016.
Manumpa sa iyang bag-ong katungdanan si Senador Santiago dungan sa laing bag-ong unom ka huwes sa ICC karong buwan sa Marso ning tuiga. (FPG/PIA-Zamboanga del Norte)
