ni Franklin P. Gumapon
DIPOLOG CITY, Jan. 24 (PIA) - - Nangulo si Pangulong Benigno Simeon C. Aquino III sa paghatag pasidungog ubos sa Philippine Quality Awards (PQAs) nga gipahigayon karong bag-o didto sa Malacañang.
Sa iyang pagkigpulong atol sa maong okasyon, gipasabot ni Pangulong Aquino nga ang maong kalihokan mao ang pag-ila sa “organizational excellence” nga makab-ot lamang ubos sa usa ka dapit diin ang talento ug kasibot sa matag empleyado makita sa “teamwork” ug pagsalig sa matag-usa.
Sukad kaniadtong 1997, ang PQAs naghatag ug pasidungog ngadto sa mga pribado ug pampublikong buhatan nga nakahatag ug de kalidad nga serbisyo ug pinakamaayong pagpadagan sa ilang tagsa-tagsa ka organisasyon.
Dugang ni Aquino nga ang maong pasidungog nakab-ot tungod gihimo sa matag-usa nga kanunay makahatag alang sa maayong pagdumala aron makabo-ot ang usa ka de kalidad nga pag-alagad.
Matud ni Pangulong Aquino nga ang usa ka organisasyon nga nag-lunang sa korapsyon dili gayud makahatag ug maayong pag-alagad.
Nakadawat sa maong pasidungog mao ang mosunod: Automotive Airconditioning Technology Philippines, Inc. sa Laguna ug NYK-TDG Ebusiness Corporation sa Taguig City alang sa “Proficiency in Quality Management;” Department of Science and Technology (DOST)-IX ug Metals Industry Research and Development Center sa Taguig City alang sa “Commitment to Quality Management.” (FPG/PIA-Zamboanga del Norte)
