DIPOLOG CITY, JAN. 29 (PIA)--- Ang Nasudnong Kagamhanan, pinaagi sa National Housing Authority magpabarog ug 390 ka mga balay sa Sulu.
Si Bise-Presidente Jejomar Binay, kinsa mao usab ang Chairman sa Housing and Urban Development Coordinating Council, nagkanayon nga lakip sa mga benepisyaryo sa programa ang mga Filipino-Muslim nga bag-ohay pa lang gipapauli gikan sa Sabah.
Matod pa ni BInay mipirma na ug Memorandum of Agreement ang Nasudnong Kagamhanan uban sa Lokal nga Kagamhanan sa Sulu alang sa paghatag ug desente ug baratong balay sa mga Muslim natong mga kaigsoonan.
“Gusto namong duna silay balay nga matawag nga ilang kaugalingon. Naglaum kami nga gumikan niini, madasig silang magpabilin sa lugar ug dili na lang ipanimpalad ang ilang kinabuhi sa ubang nasod pinaagi sa illegal nga paagi,” dugang pa sa Bise-Presidente.
Ang Bangsa Moro Pabahay Project maoy usa ka hiniusang kalihokan sa NHA, Department of Social Welfare and Development(DSWD) ug Autonomous Region in Muslim Mindanao ug Kagamhanang-Panlalawigan sa Sulu.
Ang DSWD-ARMM ug Kagamhanang-Panlalawigan sa Sulu mipili sa 74,364.15 metriko-kwadrado nga housing site gikan sa 25 ka hektaryang yuta sa NHA sa Barangay Anuling, Patikul, Sulu.
Gibana-banang 46,991.25 metros ang una nang nagahin para sa proyekto, apan gipalapdan kini human nag-isyo ug memorandum si NHA General Manager Chito M. Cruz niadtong Oktubre 2011alang sa paggahin ug dugang 110 ka metros nga alokasyon alang sa mga biktima sa baha sa Sulu.
Una niini ang nasudnong buhatan sa DSWD nagpagawas ug 4.5 milyones ka pesos para sa konstrukson sa 180 ka mga core shelter units para sa mga pamilyang-benepisyaryo sa Sulu ug laing 100 ka units alang sa mga nagpuyo sa mga baha-anan nga lugar ug delikadong mga dapit.
Ang proyekto maghatag usab ug 110 ka lote para sa mga biktima sa baha.
Ang Bangsa Moro Pabahay Project maoy tipik sa pasalig ni Presidente Benigno Aquino III nga tubagon ang problema sa pabalay sa mga Filipino.(ATR/PIA9-Zambo Norte)
