Ni Alma L. Tingcang
PAGADIAN CITY, January 29 - - Gikalipay ug dako sa Malacanang ang taho nga ang Puerto Princesa Underground River (PPUR) gideklarar na isip usa sa New7Wonders of Nature.
“Ang kumpirmasyon nga ang PPUR usa sa New7Wonders of Nature gikalipay ug dako sa Palasyo. Ang tanang mga Pilipino mihatag sa ilang panahon, kusog ug kahinguhaan aron pagpangampanya sa tibuok panahon sa kompetisyon,” si Presidential Spokesperson Edwin Lacierda miingon sa usa ka pamahayag kagahapong adlawa.
Ang Puerto Princesa Underground River nakumpirma na isip usa sa New Seven Wonders of Nature. Mao kini ang kinatas-ang navigable underground river sa kalibotan.
“Tungod sa mga paningkamot sa kampanya, dili lamang sa laing nasod kundili dinhi usab sa Pilipinas, ang mga turistang mibisita sa PPUR misaka pag-ayo. Nagpaila lamang kini nga positibo kaayo ang nasudnong paningkamot aron pagsuporta sa garbo sa Pilipinas, ang Puerto Princesa Underground River – aron mouswag ang atong pagpakabana, pagpakita sa atong garbo, ug pagbaton sa mga resulta sa atong hinugpong nga paningkamot,” si Lacierda namulong.
Niadtong 2011, si Presidente Benigno Aquino Iii miawhag sa tanang Pilipino dinhi ug sa gawas sa nasod aron pagsuporta sa garbo sa Pilipinas.
Sa iyang kabahin, si Bernard Weber, founder-president sa New7Wonders of Nature, mipahalipay sa mga Pilipino sa gipakitang suporta ngadto sa kalibotanong kampanya.
“Sa dihang ang inyong presidente, si Presidente Benigno Aquino III mipagawas sa iyang suporta sa pagkampanya sa PPUR, nasayod na ako nga ang inyong nasod seryoso kaayo sa inyong paningkamot,” si Weber miingon.
Ang mga fans sa PPUR sa tibuok kalibotan mitubag sa panawagan aron pagbotar, ug ang kumpirmasyon karon maoy ganti sa inyong gipakitang kadasig,” dugang pa ni Weber.
Ang provisional New7Wonders of Nature mao kining mosunod: Amazon, Halong Bay, Iguazu Falls, Jeju Island, Komodo, Puerto Princesa Underground River ug Table Mountain. (ALT-PIA9/Zambo Sur)
