DIPOLOG CITY, JAN. 28(PIA)--- Gipangunahan kagahapon (Biyernes/Enero 27, 2012) ni Presidente Benigno Aquino III ang paglusad sa Philippines Business Registry System didto sa dakbayan sa Makati.
Kini nagtumong nga mapadali ang pagparehistro sa patigayon ug malikayan ang “red tape” nagkalain-laing ahensiya sa gobyerno .
Ang PBRS maoy usa ka sistema nga nakabase sa web nga magsilbi isip one-stop shop para sa mga negosyante nga magparehistro sa ilang patigayon. Ang computerized registration system magsilbing tulay sa nagkalain-laing ahensiya sa gobyerno aron ang aplikante makaparehistro sa ilang patigayon nga dili na kinahanglang personal pang moadto sa maong mga buhatan.
Ang mga ahensiya nga nagka-interlink ilalom sa PBR system naglakip sa Department of Trade and Industry(DTI); Bureau of Internal Revenue(BIR); Home Development Mutual Fund(PAG-BIG); Phil. Health Insurance Corp.(PhilHealth); Social Security System(SSS) ug Securities and Exchange Commission(SEC).
Usa sa mga kagamhanang-lokal nga konektado na sa sistema mao ang dakbayan sa Quezon. Gilauman nga magpakonektar na usab sa umaabot nga mga bulan ang dakbayan sa Caloocan ug Mandaluyong.
Ang paglusad sa PBRS kahapon mao ang unang yugto sa programa. Karong tuiga, gilauman nga daghan pang mga kagamhanang-lokal ug mga ahensiya (regulatory offices) sa gobyerno ang magpakonektar na usab sa sistema.
Ang PBRS nga usa sa parayoridad nga proyekto sa administrasyong Aquino tinguhang mapasayon ang proseso sa pagrehistro sa patigayon ug pagwagtang sa “red tape” sa gobyerno.
Pinaagi sa PBRS, naglaum ang administrasyong Aquino nga makadani ang Pilipinas ug dugang mga mamumuhunan ug mapataas usab ang grado sa Pilipinas sa “Global Business Competitiveness.
Sa maong okasyon, gisaksihan usab sa Presidente kauban nila ni Trade and Industry Sec. Gregory Domingo ug Trade Undersec. Zenaida Maglaya ang paghatag ug citation certificates sa Pangulo sa 5 ka mga ahensiya sa gobyerno nga nalambigit sa programa sama nila ni SEC Chairperson Teresita Herbosa; PAG-BIG Fund Executive Officer Atty. Darlene Berbesabe; BIR Deputy Commissioner Lilia Guillermo; SSS President ug Chief Executive Officer Emilio De Quiros Jr.(ATR/PIA9-Zambo Norte)
