ni Franklin P. Gumapon
DIPOLOG CITY, July 24 (PIA) - - Atol sa iyang State
of the Nation Address didto sa Batasang Pambansa sa dakbayan sa Quezon
kagahapon, nagla-um si Pangulong Benigno Simeon C. Aquino III nga makab-ot sa
nasud nga gitinguha niining 4.6 milyones nga tourist arrivals ning tuiga.
Gibutyag sa Presidente nga ang gidaghanon sa mga
turista nga nahidangat sa nasud sa bulan sa Hunyo mikabat na sa 2.1 milyones.
Nagla-um si Aquino nga modagsa pa ang daghang mga
turista inig abot sa “peak season.”
Matud pa sa Presidente ang gidaghanon sa mga turista
nga mibisita sa nasud sa tuig 2001 miabot lamang 1.8 milyones apan sa iyang
pagtung-tong isip pangulo nasud, ang gidaghanon sa mga turista nga mianhi sa
nasud miabot sa dul-an 3.1 milyones.
Subay niini, nagla-um si Aqunio nga adunay 1.5
milyones ka turista ang madugang sa tourist arrivals dinhi sa nasud matag tuig.
Sumala pa sa Presidente nga kon ang mga Pilipino
mopakita lamang ug susamang panaghi-usa sa ilang pagpaluyo sa Puerto Princesa Underground
River nga nahimong usa sa mga bag-ong talagsa-ong talan-awon sa kalibutan,
makab-ot usab sa nasud ang tinguha niini nga 10 milyones ka turista nga moan-hi
sa nasud sa tuig 2016.
Ang Puerto Princesa gideklarar sayo ning tuiga isip
usa sa “new wonders of the world.” Makita kini 50 kilometros sa amihanang bahin
sa dakbayan sa Puerto Princesa sa lalawigan sa Palawan.
Atol sa iyang SONA, gipaabot sa Pangulo nasud ang
iyang pagdayeg ngadto ni Sekretaryo Ramon Jimenez sa turismo sa iyang
pagpalambo sa turismo dinhi sa nasud pinaagi sa kampanya niini nga “It’s more
fun in the Philippines.” (FPG/PCOO/PIA-Zamboanga del Norte)
