ni Alfonso T. Ruda
DIPOLOG CITY, JULY
19(PIA)--- Gipanalipdan
sa Malakanyang ang Conditional Cash Transfer Program sa gobyerno uban ang
pag-ingon nga ang pondong gigahin sa kabus natong mga kaigsoonan maoy usa ka investment
sa katawhan.
Sa
usa ka press briefing sa Malakanyang, si Presidential spokesperson Edwin
Lacierda nagkanayon nga ang CCT program naghatag ug oportunidad sa umaabot nga
henerasyon sa mga kabataan nga maka-kab-ot ug edukasyon. Sa samang higayon,
maghatag usab kini ug kahigayonan sa mga inahan nga magpakabuhing mahimsog aron
makatabang sa pag-atiman sa ilang pamilya.
“Wala
akoy nakitang rason o igong katarungan aron ilang supakan ang CCT gawas lamang
nga na-depoliticized na kini ug nawala na ang patronage politics,” matod pa ni
Lacierda. “Usa kini ka investment sa katawhan,” dugang pa niya.
Matod
pa ni Lacierda, ang CCT program napamatud-an nang nagmalampuson didto sa Brazil
ug Mexico ug nagpakita usab kini ug
maayong resulta sa 79 sa 80 ka mga lalawigan nga nahimong benepisyaryo sa
programa.
“Ang
Conditional Cash Transfer Program naa sa 79 sa 80 ka mga probinsiya. 79 ka mga
probinsiya ang nalambigit sa CCT program, gawas lang sa Batanes,” matod pa ni
Lacierda.(ATR/PCOO/PIA9-Zambo Norte)
