ni Franklin
P. Gumapon
DIPOLOG CITY, June 2 (PIA) - - Gibutyag ni Pangulong Benigno Simeon C.
Aquino III ngaiyang tuki-on ang West Philippine Sea issue kauban ni US
President Barack Obama ug British Prime Minister David Cameron sa ilang
panagkita sunod semana.
Mao kini ang pamahayag sa Presidente karong bag-o atol sa iyang pag-adto
sa dakbayan sa Iloilo may kalabot na sa standoff tali sa nasud sa China.
“Nakaseguro ko nga inig bisita nako ni UK Prime Minister David Cameron,
mangutana siya sa kahimtang sa maong butang kay kini usa ka dakung bahin sa
kadagatan diin daghang mga magpapatigayon nga moagi dinhi. Busa, kining butanga
gikabalak-an sa tanan,” pamahayag sa Pangulo nasud.
Dugang pa sa Presidente nga kon adunay kausaban sa kahimtang sa West
Philippine Sea, lagmit maapektuhan ang dagan sa serbisyo ug ubang produkto nga
moagi dihang dapita.
Sa pangutana kon unsa ang iyang marching orders sa bag-ong natudlo nga
ambassador sa China nga si Sonia Brady, siya nagkanayon nga si Brady suheto
kaayo sa maong nasud, naka-ila siya kon kinsa ang angay niyang estoryahon ug
nahibalo siya kon unsay angay niyang ipahayag.
Naglaum ang Presidente nga ang pagkatudlo ni Brady mopalig-on sa
panagsabot-sabot tali sa Pilipinas ug China.
Ang Pangulo nasud mogikan ngadto sa United Kingdom alang sa tulo ka adlaw
nga official visit. Mao kini ang unang pagbisita ni Aquino sa maong nasud human
siya milingkod isip Presidente niadtong Hunyo 2010.
Pagkatapos sa iyang biyahe sa London, molupad ang Presidente didto sa
Estados Unidos aron makigtagbo ni Presidente Barack Obama.
(FPG/PCOO/PIA-Zamboanga del Norte)
