ni Alfonso T. Ruda
DIPOLOG CITY, JUNE
2(PIA)--- Sa
tinguhang batukan ang dengue, ang Department of Science and Technology(DOST),
nang-apod-apod karon ug Ovicidal-Larvicidal traps kon OL traps sa tanang pampublikong
tunghaan sa tibuok nasod sa dili pa mosulod ang panahon sa tingulan.
“Ang
DOST nanghatag ug OL trap kits sa tanang pampublikong tunghaan,” matod pa ni
DOST Secretary Mario Montejo. “Ang OL traps mosanta sa pagdako sa larvae nga
mahimong lamok nga magdala ug dengue, ug tinguha namo nga makontrol ug
malikayan ang pagkatap sa sakit sa mga lugar nga dunay daghang lamok nga
nangitlog panahon sa adlaw, sama sa lawak-tunghaan.”
Ang
OL trap usa lang ka simpleng tekonolohiya nga makapatay sa itlog ug mga anak sa
baying Aedes aegypti mosquito nga nagdala ug dengue virus. Ang itom nga
sudlanan makadani sa lamok nga mangitlog sa gamayng piraso sa lawanit nga gihulom
sa OL pellet solution. Ang OL pellets nga hinimo sa organic ug non-organic material,
makadani sa mga lamok ug makapatay sa ilang mga anak, ug makuhaan ang
gidaghanon sa mga lamok sa sunod nga henerasyon.
Ang
DOST OL trap program nga nakabase sa mga tunghaan, nagtumong nga makuhaan ang
populasyon sa lamok sa mga tunghaan ug komunidad ug mamenusan ang insidente sa
dengue pinaagi sa OL trap.
“Niining
maong program, higpit nga maki-koordinasyon ang DOST sa Departmento sa Maayong
Panglawas, Edukasyon ug mga Kagamhanang-Lokal,” pahibalo pa ni Montejo. Adunay
mahinungdanong papel ang matag ahensiya sa gobyerno aron mamenusan ang kaso sa
dengue sa atong mga kabataang nagtungha.”
Natumbok
na sa programa ang unang 31 ka mga priority areas nga makadawat sa unang batch
sa 435 mil ka mga OL traps sa tibuok nasod. Ang DOST naghimo sa unang batch sa
OL traps ug nagbalhin sa produksyon sa OL pellets ngadto sa pribadong entrepreneur.
“Dili
kini rocket science,” matod pa ni Education Undersecretary Jesus Lorenzo Mateo.
Ang teknolohiya sa OL trap simple lang,
apan epektibo kini pagtabang nga mamenusan ang kaso sa dengue sa mga kabataan.
“Nalipay
kami nga makauban ang DOST ug DOH sa pagpatuman niining maong proyekto,” midugang
pa si Mateo. (ATR/PCOO/PIA9-Zambo Norte)
