ni Alfonso T. Ruda
DIPOLOG CITY, MAY
21(PIA)---Samtang duha
ka semana na lang sa di pa magbukas ang klase sunod bulan, gisugdan na pagpalihok
sa gobyerno ang mga hingtungdan aron masiguro ang pagbukas sa klase nga way
hasol, sumala pa sa usa ka opisyal sa Palasyo.
Sa
usa ka press briefing nga nabati sa DZRB, usa ka sibyaanan nga gipanag-iya sa
gobyerno, gipahayag ni Presidential spokesperson Edwin Lacierda nga ilusad na Dept.
of Education ang Brigada-Eskuwela ug Oplan Balik Eskwela (OBE) sugod karong
semanaha aron tabangan ang mga tunghaan, ginikanan ug mga estudiante nga mangandam
sa umaabot nga pagbukas sa klase.
Matod
pa ni Lacierda, ang Brigada Eskwela (National Maintenance Week) nga usa ka tinuig
nga kalihokan diin ang mga volunteers mang-ayo ug manglimpiyo sa mga
pangpublikong tunghaan sa di pa magsugod ang klase sa Hunyo, ilusad karong
adlawa (Mayo 21), samtang ang OBE nga nagtumong nga tabangan ang mga tunghaan
sa mga problemang may kalabutan sa pagbukas sa klase sugdan usab karong Mayo 28.
Midugang
pa si Lacierda nga ang Brigada Eskuwela nga molungtad hangtud sa Mayo 26 dunay duha
ka “una para karong tuiga”- nakasentro kini sa sanitasyon ug ang ikaduha nakasentro
kini sa pagpalambo sa tunghaan o sa indigenous communities.
Ang
Oplan Balik Eskwela dunay tulo ka components: ang paghiusa, pagsabwag ug
impormasyon ug pagpahimutang sa Information and Action Center (IAC) sa DepEd
Central Office sa Pasig City hangtud sa Hunyo 8.
Ang
uban pang hingtungdang ahensiya sa gobyerno sama sa Philippine National Police,
Department of Health, Department of Interior and Local Government ug Department
of Public Works and Highways mohimo usab sa ilang mga gimbuhaton alang sa usa ka
luwas ug way-problemang pagbukas sa
klase.
Nanawagan
si Lacierda sa katawhang Filipinhon nga boluntaryong motabang niining maong makahulganong
kalihokan.
“Dunay
45 mil ka mga tunghaan ang nalambigit niini ug kon gusto kamong moboluntaryo, adto
lang sa mga tunghaan sa inyong tagsa-tagsa ka mga dapit,” matod pa ni Lacierda.(ATR/PCOO/PIA9-Zambo Norte)
