ni Franklin
P. Gumapon
DIPOLOG CITY, May 23 (PIA) - - Nanumpa sa miaging Miyerkoles atubangan ni
Pangulong Benigno Simeon C. Aquino III ang mga bag-ong natudlo’ng opisyal sa
kagamhanan nga motabang sa pagpatuman sa programang pangkalambo-an alang sa
katawhang Pilipino.
Sa usa ka yanong seremonya didto sa Rizal Hall sa Malacañang Palace,
nanumpa ang bag-ong natudlo’ng Director-General sa National Economic
Development Authority (NEDA) nga si Secretary Arsenio Balisacan puli ni NEDA
Director-General Cayetano Paderanga kinsa mi-resigned kaniadtong Mayo 10 tungod
sa suliran sa panlawas.
Si Balisacan mitapos sa iyang doctorate sa Economics sa University of
Hawaii niadtong 1985 human niya matapos ang iyang master’s degree sa
Agricultural Economics sa University of Philippines-Los Baños, Laguna sa 1982.
Iyang natapos ang kurso nga Bachelor of Science in Agriculture sa Mariano
Marcos State University sa tuig 1979 isip magna cum laude.
Nahimong magtutudlo si Balisacan sa Australian National University ug
executive director sa Philippine Center for Economic Development diin nahimo
siyang adviser ug expert sa natad sa programang pangkalambo-an.
Ang bag-ong hepe sa NEDA nakasulat ug pito ka libro ug subra sa 100 ka
articles, technical journals ug book chapters.
Dungan nga nanumpa ni Balisacan sa ilang katungdanan sila si Ambassador
Domingo Lee ug Ambassador Cesar Zalamea isip mga special envoy sa Presidente
didto sa nasud sa China, opisyales sa Philippine Coast Guard (PCG) nga sila si
Vice Admiral Edmund Tan, Rear Admiral Cecil Chen, Rear Admiral Lino Dabi ug
Rear Admiral Luis Tuason Jr. nga sinaksihan ni Secretary Manuel Roxas II sa
Department of Transportation and Communication (DOTC).
Laing mga opisyales nga nanumpa atubangan sa Pangulo mao ang
representante sa Consumer Organizations ngadto sa Optical Media Board sa
buhatan sa Presidente nga si Elmar Ingles, Ferdinand Tolentino, Deputy Director
V, Public-Private Partnership Center sa NEDA ug ang laing 10 ka mga
representante gikan sa lain-laing sector ngadto sa National Fisheries and
Aquatic Resources Management Council sa buhatan sa agrikultura.
(FPG/PCOO/PIA-Zamboanga del Norte)
