ni Alfonso T. Ruda
DIPOLOG CITY, APR. 19(PIA)---Gipasalig sa Malakanyang nga magpagawas kini ug usa ka well-defined mining policy sa higayong ila nang mahuman ang gihimong halapad nga konsultasyon uban sa mga mining stakeholders.
“Makalaum kita niini sa dili madugay. Duna lay pipila ka mga nota nga kinahanglang himoon uban sa pipila ka mga departamento ug posibli na dayon kining mapagawas sulod sa pipila ka mga adlaw. Nasabtan namo ang problema ug kini ang among gustong mahitabo---usa ka well-defined mining policy nga subayan sa tukmang aksyon,” matod pa ni Secrretary Ramon Carandang sa Presidential Communications Development and Strategic Planning Office sa gipahigayong press briefing sa Malakanyang kagahapon.
Ang Chamber of Mines of the Philippines miangkon nga ang mining industry nawad-an ug dakong kantidad niadtong miaging tuig gumikan sa kawalay bag-ong polisiya sa pagmina sa nasod.
Nahisgutan pa ni Carandang ang nagpadayong diskusyon sa general mining policy nga nagkinahanglan sa pagpagawas ug Executive Order o pagbag-o sa balaod sa pagmina.
“Kining tanan posibli apan ang atong tanang lihok kinahanglang magikan sa usa ka general mining policy nga ipagawas sa dili madugay, unta sa labing daling panahon,” matod pa ni Carandang.
“Nagtoo ko nga ang bag-ong polisiya maghatag kanatog direksyon, apan ako nagtoo nga kianahanglan usab natong klarohon sa mga mamumuhunan sa industriya sa pagmina kon unsa gyud ang direksyon nga gusto sa administrasyong Aquino, pag-abot na sa pagmina.
Samtang sayo pa kaayo para moingon ta kon angay bang hatagan ug prayoridad sa administrasyon ang mining measure, gipasalig ni Carandang nga ang diskusyon sa gabayan sa industriya kinahanglang malakip usab niini.
“Úsa sa mga butang nga angay namong himoon mao ang pagsiguro nga niining maong diskusyon, maaprobahan sa mga stakeholders ang maong polisiya,” matod pa ni Carandang.(ATR/PCOO/PIA9-Zambo Norte)
