ni Alfonso T. Ruda
DIPOLOG CITY, MARCH 16(PIA)--- Gibuksan na sa Departamento sa Edukasyon ang ganghaan para sa mga out-of-school youth o mga kabataang wala magtungha nga makabalik sa pormal nga pagtungha o pagsulod ug trabaho ilalom sa 2012 Philippine Educational Placement Test(PEPT).
“Among yanong tampo sa pagpabarog sa nasod mao ang paghatag ug kahigayonan sa atong mga kabatan-onan ug kahigayonan nga magmalampuson sa kinabuhi pinaagi sa Placement Test,” matod pa ni Education Sec. Armin Luistro.
Ang resulta sa eksaminasyon maoy magdeterminar sa grado o year level sa mokuha sa pasulit. Ang PEPT magsakop sa tanang grado o year level gikan sa Grade I hangtud sa 4th Year High School aron ang mokuha sa eksaminasyon makaangkon ug kahigayonan nga mosaka sa sunod nga grado o year level ug bisan gani ang pagkompleto ug basic ecucation pinaagi lang sa usa ka eksaminasyon. “Posibli kini kon nagtoon ang usa ka bata sa iyang panimalay o kaha nakaangkon na kini ug taas nga kasinatian sa iyang linya sa katakos,” patin-aw pa ni Luistro.
Ang eksaminasyon magsakop sa regular nga DepEd curriculum nga mao ang English, Mathematics, Science ug HEKASI para sa Elementary ug Araling Panlipunan para sa Sekondarya. Hatagan usab sila ug Certificate of Rating nga magmatuod nga kuwalipikado na sila nga motungha sa sekondarya o kaha sa kolehiyo, depende sa puntos nga iyang nakuha sa gipahigayong eksaminasyon.
Ang kinsa mang intresado mahimong magparehistro sa Division Offices sa DepEd sa tibuok nasod gikan sa Marso 5 ngadto sa Mayo 5, 2012. Ang mga documentary requirements mao kining mosunod- form 137/138; Birth Certificate; ug duha ka 1 x 1 nga hulagway. Ang mga Divison Testing Coordinators gimanduan usab pagsumitir sa gidaghanon sa nagparehistro ngadto sa National Educational Testing and Research Center.
“Gusto namo nga ma-upgrade niadtong mokuha sa eksaminasyon ang ilang academic level, aron kon makapasar man sila, mahimo na silang makasulod ug balik sa pormal nga pagtoon, pagsulod ug trabaho o kaha mahatagan ug promosyon sa ilang trabaho,” matod pa ni Luistro.
Alayon niini, gidasig kadtong nagplanong mokuha sa PEPT nga mopahimulos sa learning modules nga giandam sa Bureau of Alternative Learning System, Bureau of Elementary Education, ug Bureau of Secondary Education o bisan uns amang learning ressurces nga makuha gikan sa rehiyonal o Division Offices sa DepEd. Magamit nila kining maong learning modules aron magrepaso sa di pa mokuha sa eksaminasyon o kaha paggamit niini isip tipik sa ilang nagpadayong edukasyon.(ATR/PCOO/PIA9-Zambo Norte)
