ni Alfonso T. Ruda
DIPOLOG CITY, MAR. 13(PIA) --- Seryoso karong gitrabaho sa Malakanyang ang pagpanday ug klaro ug makiangayong polisiya sa pagmina aron masiguro nga matubag ang tanang kabalaka sa mga stakeholders.
Ang pasalig giluwatan tigpamaba sa palasyo nga si Edwin Lacierda sa gipahigayong media briefing sa Malakanyang taliwala sa yangongo sa Philippine Stock Exchange alang sa pagpanday sa klaro, “decisive” ug praktikal nga polisiya sa pagmina.
Matod pa ni Lacierda, nagpahigayon na ang Malakanyang ug mga miting ug konsultasyon uban sa nasangpit nga mga stakeholders aron matubag ang nahisgutang mga problema.
“Oo, among gipasalig sa Philippine Stock Exchange ug tanang stakeholders nga dunay Executive Order (EO) nga ipagawas ug kana ang rason nga dunay gipahigayong miting tali sa Climate Change Cluster ug Economic Cluster aron pagtubag niining maong mga concerns – pagbalanse sa problema sa kinaiyahan, ingon man ang panginahanglan sa “sound business practice” sa bahin sa industriya sa pagmina,” matod pa ni Lacierda.
“Busa among ipasalig sa PSE nga himay-himayon namo ug maayo pinaagi sa diskusyon para sa pinal nga pagpanday sa pinal nga Orden Ehikutibo,” midugang pa si Lacierda.
“Seryoso karon namong gitun-an ang draft sa EO aron masiguro nga matubag niini ang problema sa mga stakeholders,” matod pa ni Lacierda.(ATR/PCOO/PIA9-Zambo Norte)
