ni Alfonso T. Ruda
DIPOLOG CITY, MAR. 13(PIA) --- Hingpit na karong gidid-an sa Department of Interior and LocaL Government ang tanang mga opisyales sa kamhanang-lokal pagbutang sa ilang ngalan ug larawan sa posters ug streamers, partikularmente sa pagpahibalo sa mga kalihokan may kalabutan sa Pantawid Pamilyang Pilipino Program sa gobyerno.
Matod pa ni DILG Sec. Jessie Robredo, iyang giisyo ang direktiba sa mga gobernador ug mga mayor sa mga dakbayan ug kalungsuran pinasikad sa rekomendasyon sa National Advisory Committee sa Pantawid Pamilyang Pilipino Program nga gilangkuban sa nagkalain-laing ahensiya sa gobyerno nga gipanguluhan sa Department of Social Welfare and Development.
Sa ilang rekomendayson sa DILG, ang komiti miingon nga ilang naobserbahan nga ang ngalan ug larawan sa mga lokal nga opisyal ang kalagmitang nakabutang sa mga announcement streamers ug posters sa 4Ps nga mao ang sentro sa programa sa gobyerno aron makunhuran ang kapobrehon sa nasod.
“Sa diwa sa maayong pang-gobyerno,“transparency ug accountability” sa implementasyon sa poverty reduction program sa nasudnong kagamhanan, hingpit nga gidili ang pagbutang sa larawan ug ngalan sa usa ka opisyal sa gobyerno sa mga poster ug steamer sa pagpahibalo sa mga kalihokan may kalabutan sa mga kalihokan sa 4Ps,”matod pa ni Robredo sa iyang direktiba sa mga opisyales sa kagamhanang-lokal.
Ang Pantawid Pamilyang Pilipino Program (4Ps), nga nila usab isip Conditional Cash Transfer Program, nga gipatuman sa DSWD nagtumong nga mapalambo ang kalidad sa kinabuhi sa mga kabus nga Filipinhon pinaagi sa paghatag ug cash grants nga 1,400 pesos (pinakadako) sa kabus nga pamilya nga dunay mga anak nga nagpanigdaron ug dili molapas sa 14 anyos. Bugti niini, kinahanglan usab nga patunghaon sa mga benepisyaryo ang ilang mga anak, ug ang mga inahan kinahanglan usab nga motambong sa mga regular pre-natal care ug post-natal care.
Sayo niini, ang DILG, DSWD, ug Department of Health nagkauyon sa pagpadas-og sa mga proyekto ug programa para sa mga pobreng LGUs nga natumbok sa National Household Targeting System (NHTS) sama sa 4Ps, Kalusugang Pangkalahatan Community Health Mobilization Program sa DOH ug sa Water for the Waterless LGU Program sa DILG.
Matod pa ni Robredo, ang “convergence strategy” nagtumong nga mapadali ang implementasyon sa mga programa batok sa kapobrehon ug ang rasyonalisasyon sa nasudnong kagamhanan.
“Hinuon, among giila ang suporta ug kooperasyon sa mga kagamhanang-lokal sa implementasyon sa mga programa para sa mga kabus nga natumbok sa NHTS,” matod pa ni Robredo.
Niadtong 2010, ang DILG nag-isyo ug susamang direktiba nga nagdili sa paggamit sa ngalan ug imahen sa mga opisyales diha sa mga billboards ug “signages” sa mga programa ug proyekto sa gobyerno, ingon man sa mga firetrucks, ambulansiya, ug mga sakyanan sa pulis. (ATR/PCOO/PIA9-Zambo Norte)
