ni Alfonso T. Ruda
DIPOLOG CITY, MAR. 2(PIA)---Kasamtangan karong girepaso sa administrasyong Aquino ang balaod sa pagmina sa nasod aron masolusyonan ang mga bikil niini ug madani ang mga kapitalista nga mobutang ug puhonan dinhi sa Pilipinas.
Sa gipahigayong media briefing sa Malakanyang, gipahayag ni Finance Secretary Cesar Purisima nga gilantaw karon sa mga kompaniya sa pagmina ang mga lugar nga base sa kasaysayan, dunay dakong deposito sa mineral resources.
“Siyempre, gilantaw sa mga kompaniya sa pagmina ang mga lugar nga iladong dunay daghang deposito sa mineral resources, diin ang Pilipinas nabaniog ug nailhang mao ikalima ka nasod nga dunay dakong mineral resources, pinasikad sa pagtoon nga gihimo sa United Nation,” matod pa ni Purisima.
“Gilantaw usab sa mga gustong magmina ang istabilidad sa panggobyerno sa usa ka nasod ug ang balaod nga gipatuman kabahin sa pagmina. Sanglit ang among pagpaningkamot nagtumong man nga masiguro nga maplastar ang mga maayong polisiya kabahin sa pagmina, ug matin-awan ang tanan sa mga isyo nga nakapalibog ug medyo nagkasumpaki,” dugang pa ni Purisima.
Sa samang higayon, gipadayon usab sa gobyerno ang pagpanday ug bag-ong regulatory environmental policies nga makaayo alang sa mga gustong mag-invest sa pagmina dinhi sa nasod.
“Ang gusto karon ni Presidente Benigno Aquino III nga mahimong episyente ang pagpatigayon dinhi sa Pilipinas alang niadtong dili kayo kabisado sa lokal nga mga negosyante,” matod pa ni Purisima.
“Sa pagrepaso sa polisiya, gihatagan ug punto ni Presidente Aquino ang panginahanglan sa pagpahigayon ug konsultasyon uban sa mga stakeholders. Wa-lay suwerte, tungod kay nataas ang panahon sa konsultasyon kay sa giplano. Ug mao kana karon ang proseso nga among gisunod ug nanghinaut kami nga sa dili madugay makapagawas na kami ug bag-ong polisiya kabahin sa pagmina,” panapos pa ni Purisima.
Ang kausaban sa balaod sa pagmina maoy gilaumang maghatag ug dalan alang sa gobyerno nga malantaw ang nagkalain-laing alternatibo aron mahatagan ug tubag ang problema sa pipila ka sektor.
