ni Alfonso T. Ruda
DIPOLOG CITY, MARCH 15(PIA)--- Gimanduan karon ni Labor Secretary Rosalinda Baldoz ang mga rehiyonal nga buhatan sa Department of Labor and Employment nga himoong child labor-free zone ang mga barangay sa ilang tagsa-tagsa ka mga rehiyon isip tipik sa tinguha sa gobyerno nga wagtangon ug santaon ang child labor dinhi sa nasod.
Among gihingusgan ang implementasyon sa Child Labor Prevention and Elimination Program pinaagi sa paghimo sa mga natumbok nga barangay nga dunay daghang kaso sa child labor ngadto sa “child labor-free” barangays. Target namo ang 80 ka mga barangay,” matod pa ni Baldoz.
Hangtud sa ulahing bahin, gimanduan ni Baldoz ang 16 ka mga rehiyonal nga buhatan sa DOLE nga buhion ug balik ang Barangay Council for the Protection of Children (BCPC) sa ilang lugar nga nasakupan aron motabang kanila sa ilang gimbuhaton. Ang matag rehiyon moila ug tagilma ka barangay nga dunay taas nga kaso sa child-labor o mga kabataang nahimong laborer sa ilang lugar ug paghimo niining maong mga barangay nga zero child labor-free barangays.
Matod pa ni Baldoz ang programa maoy tipik sa commitment sa gobyerno nga batukan ang child labor pinaagi sa kusganong aksyon aron mahimong child labor-free ang Pilipinas.
“Ang trabaho naglangkob sa hugtanong koordinasyon tali sa Local Chief Executives – gikan sa Gobernador ngadto sa mga mayor, ngadto sa mga kapitan, alang sa pagkab-ot sa katumanan sa maong katuyoan,” matod pa ni Baldoz.
Matod pa ni Baldoz, ang mga rehiyonal nga buhatan sa DOLE magpatuman ug partnership program uban sa ilang LGUs, partikularmente ang mga kapitan ug mga konsehales sa mga barangay diha sa pagpanalipod ug pagpreserbar sa katungod sa mga kabataan.
Ilalom sa maong programa, ang mga barangay council makig-partner sa DOLE aron masiguro ang pagpanalipod sa child labor sa ilang tagsa-tagsa ka mga komunidad. Ang rehiyonal nga buhatan sa DOLE mao ang magbansay-bansay sa mga membro sa konseho sa pagmonitor ug pagtaho sa mga insidente sa child labor ug pagsabwag ug tukmang impormasyon may kalabutan sa peligro sa child labor.
Ang BCPC dunay mahinungdanong papel niining maong gimbuhaton. Ilang suportahan ang rehiyonal nga buhatan sa DOLE pag-establisar ug community-based mechanism para sa pag-ila, pagmonitor ug pagtaho sa pinakadelikadong matang sa child labor sa ilang lugar ngadto sa mga hingtungdang otoridad. Motabang usab sila sa pag-ila sa gikinahanglang hinabang ug suporta sa mga benepisyaryo sa programa, sama sa mga child laborer ug sa ilang mga ginikanan.
Ang DOLE sa laing bahin, mohatag ug complementary service, sama sa orientation sa Akta Republika 9231, kon ang balaod nga Elimination of the Worst Forms of Child Labor ug R.A. 9208 kon Anti-Human Trafficking Law.
Pinaagi sa Bureau of Workers with Special Concerns , ang DOLE mangusog sa ilang adbokasiya pinaagi sa pagpanday ug mga ordinansa aron masanta ug mawagtang ang child labor.
Niadtong 2011, ang padayong pagmonitor sa mga rrehiyonal nga buhatan sa DOLE nakakunhod sa kaso sa child labor sa nagkalain-laing bahin sa nasod ingon man sa regular nga kampanya sa RA 9231, ug 9208, ug uban pang balaod nga nanalipod sa mga kabataan, naghatag ug dalan sa mga kagamhanang-lokal pagpasar ug mga ordinansa nga manalipod ug magpromtote sa kaayuhan sa mga kabataan.
Nahinumdoman ni Baldoz nga ang Department of Interior and Local Government niadtong miaging tuig mi-isyo ug Memorandum Circular 2011-133 nga nagmando sa tanang mga gobernador, mga mayor , kapitan sa barangay, ug mga regional directors nga magpanday ug lehislasyon nga motubag sa child labor.
Ang direktiba nagmando usab sa mga Local Chief Executives pag-integrate sa ilang mga inisyatibo sa mga plano ug programa sa mga departamento, ang lakang nga mas naghatag ug ngipon sa implementasyon sa PPACI sa lokal nga level.(ATR/PCOO,PIA9-Zambo Norte)
