ni Alfonso T. Ruda
DIPOLOG CITY, FEB. 24(PIA)--- Ang mapuslanong sistema sa edukasyon kinahanglang makaprodyus ug Filipino nga andam nga mahimong tipik sa pagmartsa sa nasod padulong sa reporma ug kalambuan.
Kini ang mensahe ni Presidential Communications Operations Office Secretary Herminio “Sonny” Coloma sa iyang pagpakigpulong sa paglusad sa libro nga gisulat sa kanhing Kalihim sa Edukasyon nga si Mona Valisno didto sa Dusit Thani Hotel sa dakbayan sa Makati.
Ang libro ni Valisno nga nag-assess sa sistema sa edukasyon sa nasod sa nakalabayng pipila ka dekada nag-ulohan ug “The Nation’s Journey to Greatness: Looking Beyond Five Decades of Philippine Education.”
“Samtang atong saulogon ang ika-26 ka tuig nga anibersaryo sa EDSA People Power Revolution, maka-ayo usab alang kanato nga pahinumdoman nato ang atong kaugalingon nga ania kanato nakataya ang kaugmaon sa atong nasod. Kon ang sistema sa edukasyon matuod gyud nga mapuslanon, kinahanglang maka-prodyus kini ug mga Filipino nga dili lamang dunay talagsaong gasa gikan sa kahitas-an ug malantip nga salabutan, kundili andam usab nga mosalmot ug motampo sa paglambo sa atong nasod,” matod pa ni Coloma.
“Kinahanglan natong mosugal alang sa atong nasod nga natawhan. Kinahanglan kitang mosugal para sa atong Pilipinas,” dugang pa ni Coloma.
“Ang libro ni Valisno mipaambit sa kinaadman ug kasinatian sa mga mahinungdanong kalambuan nga nag-umol ug naghatag ug unod sa edukasyon sa nasod,” pahayag pa sa Kalihim.
Giangkon usab ni Coloma nga wala makab-ot sa nasod nga mahimo kining globally competitive gumikan sa kahuyang sa sistema sa edukasyon.
Kini ang hinungdan, matod pa niya nga gipatuman sa Departamento sa Edukasyon ang mga reporma, partikularmente ang K+12 program. Sa mga nasod nga sakop sa Association of Southeast Asian Nations, bugtong ang Pilipinas na lamang ug Mynmar ang wala mag-implementar sa K+12 program.
Hinuon, gihatagan ug punto sa Kalihim nga bisan ug huyang ang sistema sa edukasyon sa Pilipinas, angay pa gihapong ipasigarbo sa Pilipinas ang mga Pinoy sa nagkalain-laing bahin sa kalibutan nga matawag nga “world class” nga nagdawat ug suweldo nga dako pa kay sa national per capita average.
“Nagpakita lang kini nga kon ato gyung i-implementar ang matinud-anong reporma sa edukasyon, sama sa gisugyot ni Valisno sa iyang libro, ang atong nasod u gang katawhan maka-abot gyud sa gidamgong ekonomikanhong kalambuan,” matod pa ni Coloma.
“Gawas pa niini, kinahanglan usab nga dunay pagsalig sa iyang kaugalingon ang usa ka Filipino,” matod pa niya.
Ang libro nga gisulat ni Valisno maoy usa ka komprehensibong assessment sa mga reporma, kalampusan ug kahuyang sa sistema sa edukasyon sa Pilipinas sulod sa lima ka dekada, ilalom sa lima ka Presidente; gikan kang Presidente Ferdinand Marcos hangtud kang Gloria Macapagal-Arroyo. Naghatag usab kinig mga rekomendasyon ug mga plano kon unsaon pagpatuman ang nahisgutang reporma sa sistema sa edukasyon.
Ang halin sa mga libro mapunta sa pondo para sa mga scholarship sa mga kabus apan utokang mga magtutungha nga dumalaon sa Fund for Assistance to Private Education (FAPE).
Si Valisno, usa ka seasoned ug multi-awarded educator, nagsugod isip usa ka classroom teacher ug misaka gikan sa ranggo ug nahimong Kalihim sa Edukasyon kang kansang kontribusyon ug kasinatian nakaangkon ug pag-ila dinhi sa sulod ug gawas sa nasod.(PCOO/ATR/PIA9-Zambo Norte)
