By Alma L. Tingcang
PAGADIAN CITY, February 21 (PIA) - -Aron pagtuman sa panaad sa administrasyon ngadto sa katawhang Pilipino, si Presidente Benigno Aquino III mipasalig pagbuntog sa korupsiyon, pagpatuman sa inclusive growth alang sa tanan, ug paghatag sa usa ka gobyerno nga responsable ngadto sa tanang katawhan.
Sa iyang mensahe atol sa pagbukas sa Cabinet Workshop on Anti-Corruption Strategies didto sa Heroes Hall sa Malacanang, ang presidente nagpamatuod sa nagpadayong paningkamot sa gobyerno aron pagtuman sa iyang saad sa katawhan niadtong panahon sa kampanya nga nalangkob sa iyang reform agenda.
“Sa pagsugod sa akong kampanya, nag-ingon ako nga ang trabaho sa presidente naglakip sa tulo ka butang. Una mao ang malampusong alokasyon sa mga resources – nga isip usa ka nasod nga dako ug utang ug limitadong kahinguhaan, angay lamang nga gamiton nato kini alang sa kinadak-ang benepisyo sa atong katawhan,” ang presidente nagkanayon.
“Ang ikaduha mao ang pagseguro nga samtang padayon ang atong paglakaw padulong sa kalamboan, walay usa nga mahibilin. Nagtuo ako nga trabaho sa gobyerno ang pagpatuman sa inclusive growth, samtang ang ikatulo mao ang malig-ong bato diin natukod kining duha, ang pagtuo nga pinaagi sa pagbuntog sa korupsiyon, makunhoran nato ang kakabos. Sa simpleng pagkaingon, mao kini ang ideya nga gibotaran sa napulo ka minilyon nga Pilipino niadtong eleksiyon sa Mayo 2010 ---Kung walang corrupt, walang mahirap,” dugang pahayag sa presidente.
Matod pa niya, mao kini ang mga stratehiya aron pag-ilis sa status quo. “Usa ka status quo diin ang mga taxpayers magtan-aw sa usa ka gobyerno nga mopalingkawas, diin magtukod kini ug mga tulay ug kalsada sa tinuoray, diin ang mga Pilipino nga naningkamot pag-ayo makaangkon ug ganti, ug ang mga sulogoon sa publiko naglantaw sa katawhan isip ilang mga amo o agalon,” saysay sa presidente.
Ang hepe ehekutibo mipahayag sa iyang dakong paglaum nga ang mga mitambong sa maong workshop dako ug ikatabang ngadto sa gobyerno aron pagtuman sa mga panglataw sa usa ka gobyerno diin walay luna ang korupsiyon.
“Malaumon ako nga pinaagi sa mga ideya nga atong makalap karon, makadugang pa kini sa atong kalamposan. Gamiton nato kini nga oportunidad aron makat-on gikan sa matag-usa hangtod matuman ang mga damgo uban sa tanang katawhan – mao kini ang usa ka nasod nga Pilipinas nga diin walay luna ang korupsiyon, padulong ngadto sa kalamboan,” ang presidente miingon.
“Kung magpabilin kitang matinud-anon sa ideya sa katawhan alang sa usa ka matarong ug dayag nga pangagamhanan, nan, segurado ako nga dugang kalamboan ang nagpaabot kanato,” matod niya.
Si Professor Robert Klitgaard, kinsa giila isip “nag-unang kalibotanong experto sa korupsiyon” maoy nagpahigayon sa workshop nga gitambongan sa mga miyembro sa gabinete.
Si Klitgaard maoy nagtambag sa daghang mga gobyerno kalabot sa economic strategy ug institutional reform, ug ang iyang mga konsultasyon ug research nagdala kaniya ngadto sa 30 ka nasod sa Africa, Asia ug Latin America. (ALT-PIA9/Zambo Sur)
