ni Alfonso T. Ruda
DIPOLOG CITY, FEB. 13(PIA)---Nagpasidaan karon ang Malakanyang ngadto sa mga Filipino batok sa pagtrabaho isip mga drug mules kon tigdala ug ginadiling droga sa mga international drug syndicates aron makalikay sa silot nga kamatayon.
Ang tigpamaba sa Malakanyang nga si Edwin Lacierda miluwat sa pasidaan sa usa ka pakighinabi sa sibya-anang DXRB-Radyo ng Bayan nga gipanag-iya sa gobyerno human duha ka Filipino ang gikatahong nadakpan didto sa Macau niadtong Pebrero 1 gumikan sa pagpayuhot sa ginadiling droga.
Ang administrasyong Aquino nga dunay malig-ong polisiya batok sa illegal nga droga, nagpahigayon na ug komprehensibo ug mga pro-active measures nga motubag sa isyo sa drug mules ug manalipod sa mga Filipino aron dili mabiktima sa mga international drug syndicates.
Matod pa ni Lacierda, angay nang makakuha ug leksyon ang mga Filipino sa gidangatan sa atong mga kababayan nga nahukman sa silot nga kamatayon dido sa Tsina gumikan sa pagkalambigit sa pagpayuhot sa ginadiling droga didto sa maong nasod niadtong miaging tuig.
“Pagkatapos, kon ugaling mapahamtangan sila ug silot nga kamatayon, pas-anon usab sa katawhang Filipinhon ang ilang problema. Busa angay na kitang makakat-on ug leksyon gikan sa maong kasinatian ug dili na gyud magpagamit sa mga sindikato,” matod pa ni Lacierda.
Gia-awhag ni Lacierda ang katawhang Filipinhon nga sundon ang panawagan sa gobyerno aron dili mabiktima niining maong mga sindikato.
“Kini ang atong hangyo sa atong mga kaigsoonang Overseas Filipino Workers ug sa mga tawong gustong mogawas sa nasod nga dili magpagamit sa mga sindikato sa ginadiling droga ug dili usab ipagamit ang ilang mga butang sama sa maleta nga sudlan sa ilang mga gamit nga dili una personal nga ma-inspeksyon, “ matod pa ni Lacierda.
Ang Departamento sa Kalihokang Langyaw mitaho nga duha ka mga Filipino – lalaki ug babaye ang nadakpan sa Judiciary Police didto sa usa ka apartment sa Macau. Nakuha gikan sa posisyon sa duha ang 46 ka gramong methamphetamine hydrochloride nga mas naila dinhi sa Pilipinas nga “shabu.”
Ang nakompiskang ginadiling droga, gibana-banang nagkantidad ug $11,392,405. Nakuha usab gikan sa apartment sa duha ang pipila ka drug paraphernalia. Ang suspetsadong buyer nga usa usab ka Filipino, gi-imbitar usab sa mga pulis aron sukit-sukiton.
Matod pa ni Lacierda, mihatag na ang kagamhanan sa PIlipinas ug tabang-pinansyal sa gipang-ditinir nga mga Filipino aron masiguro nga tahuron ang ilang tawhanong katungod.
Sumala pa sa taho, duna pay 19 ka mga Filipino nga nalambigit sa ginadiling droga ang gibilanggo didto sa Macau gumikan sa ginadiling droga.
Ang Kagamhanan sa Pilipinas hugtanong nakigtinabangay karon sa nagkalain-laing ahensiya nga tigpatuman sa balaod sa ubang mga nasod may kalabutan sa kampanya batok sa ginadiling droga.(ATR/PIA9-Zambo Norte)
