ni Alfonso T. Ruda
DIPOLOG CITY, FEB. 23(PIA)---Subay sa labing ulahing kamanduan ni Presidente Benigno Aquino III, gisugdan na karon sa Department of Energy(DOE) ang proseso sa pagbutang ug usab ug 1,200 pesos sa mga benepisyaryo sa Pantawid Pasada Program para sa mga dyip nga pampasahero.
Sumala pa sa DOE, sanglit duna may 100 mil ka mga cards nga na-isyo, dili kini dungang masudlan---pipila niini ang unang makargahan, samtang ang uban maulahi. Ang pagbutang ug usab ug pondo ibase sa numero sa mga plaka, sugod sa nagtapos ug zero hangtud sa nagtapos ug nueve.
May kalabutan niini, ang DOE nakatakdang magpagawas ug news bulletins may kalabutan sa mga cards nga ilang masudlan ug pondo.
Ang Pantawid Pasada Program(PPP) nga nagsugod niadtong Mayo sa miaging tuig, maoy usa ka temporaryong lakang sa gobyerno aron makuhaan ang gibug-aton sa mga problemang gipas-an sa mga operators sa mga pampublikong sakyanan gumikan sa way-hunong nga pagsaka sa presyo sa mga produktong petrolyo.
Alang sa dugang impormasyon may kalabutan sa pagpang-apod-apod ug uban pang impormasyon kabahin sa Pantawid Pasada Program, gi-awhag sa DOE nga motawag sa telepono, (02)984-6381 o kaha magtext lamang sa mosunod: Globe-0917-556-0759; Smart: 0947-392-5378,ug Sun: 0932-778-6494.(ATR/PIA9-Zambo Norte)
