By Alma L. Tingcang
PAGADIAN CITY, February 23 (PIA) - - Ang Department of Social Welfare and Development (DSWD) nagpabilin sa iyang posisyon nga dili i-commercialize ang pag-donate sa mga organs ug tissues sa tawo.
Kini gibutyag human ipasaka ang mga legislative proposals diha sa Kongreso aron pag-regulate sa human organ donation.
Sa usa ka sulat nga gisumite sa DSWD ngadto kang Congressman Alfredo D. Maranon III, Chairman sa Committee on Health, ang Departamento nagtuo nga ang regulasyon sa human organ donation magpasabot usab sa “pagnegosyo o pagbaligya sa human organs.”
Dugang pa niini, gipahayag sa DSWD nga wala silay plano nga mosuporta sa usa ka lakang aron pagmugna sa Philippine Network for Organ Sharing.
Lakip usab sa posisyon sa nasangpit nga ahensiya nga ang mga menor de edad dili tugotan nga mahimong organ donor bisan pa ngadto sa ilang mga paryente. Apan bisan kinsa nga nagpanuigon ug 18 anyos, adunay hustong pangisip ug nakasabot sa matang ug sangputanan sa pag-transplant ug organs gikan sa iyang lawas puwede nga mo-donate pinaagi sa usa ka sulat pag-uyon o written consent alang sa pagkuha sa specific organ, tumong aron ibalhin kini ngadto sa lawas sa usa ka buhi nga tawo.
Ang DSWD mipahayag sa ilang suporta ngadto sa pag-enact sa usa ka balaudnon nga nagtumong pagpatuman ug mga polisiya nga nagdili sa commercial donation sa mga human organs, tissues o uban pang parte sa lawas sa tawo ug magpahamtang ug silot sa mosupak niini.
Alang sa tumong nga pagpatambal, gipaklaro sa DSWD nga puwede mo-donate ang usa ka tawo sa iyang parte sa lawas bisan dili nila paryente, kung ang tanang miyembro sa hingtungdang pamilya sa modawat sa organ, gipapha na isip potential donors. Sa ingon niining kahimtang, aron pagseguro sa maayong panglawas sa donor, kinahanglan hatagan siya ug after-care nga serbisyo, o incentives aron paghulip sa nahanaw nga sweldo, pagbiyahe ug housing expenses nga pwede i-reimburse sa recipient.
Naghangyo usab ang DSWD sa DOH nga maghimo ug usa ka komprehensibong programa alang sa long term monitoring sa mga donors nga matakboyan ug problemang medikal human sa ilang pag-donate sa ilang organs. (ALT/PIA9-Zambo Sur)
