By Alma L. Tingcang
| PAGADIAN CITY, February 24 (PIA) - - Ang kagamhanan nagpadayon pagpatuman ug mga hamubo ingon man long-term nga mga stratehiya aron pagsulbad sa unemployment sa nasod labi na sa pagtugma sa mga trabahante ngadto sa mga skills nga gikinahanglan sa pagpanarbaho, usa ka opisyal sa Palasyo ang miingon. Sa usa ka press conference didto sa Malacanang kagahapon, si Presidential Spokesperson Edwin Lacierda miingon nga ang long-term strategy mao ang implementasyon sa K+12 Program o Kindergarten ug dugang 12 ka tuig. Ang programang K+12 sa Department of Education (DepEd) nagtumong aron ang basic education himoong supisyente, ingon man kinsa kadtong migradwar puwede na makakita ug maayong trabaho ug aron makatagamtam sa mabungahong kinabuhi. “Sa laing bahin, ang short-term plan naglakip sa paghatag ug mga skills training ngadto sa katawhan pinaagi sa Technical Education and Skills Development Authority,” (TESDA) si Lacierda miingon. “Mao kini hinungdan nganong adunay TESDA, human mogradwar sa high school, pwede na moadto sa TESDA aron makapahimulos sa scholarship nga gihatag sa maong ahensiya,” pahayag ni Lacierda. Si Lacierda miingon nga gihatagan ug kabug-aton ni Presidente Benigno Aquino III ang problema sa job mismatch dinhi sa nasod ug kung masulbad kini, mas daghan ang makakita ug trabaho. “Mao kini ang rason nganong kinahanglan masulbad ang mismatch sa skills ug sa trabaho. Gihatagan na kini ug kasulbaran karon,” si Lacierda miingon. Ang Department of Labor and Employment padayong nag-implementar ug mga inisyatibo ug usa niini mao ang Public Employment Service Offices (PESOs) aron paghatag trabaho alang sa 1.2 milyon jobseekers ning tuig 2012. Importante ang papel nga gidala sa mga PESO diha sa pagpatuman sa 22-point labor and employment agenda ni Presidente Aquino, nga nagtumong aron pagpamuhunan sa mga nag-unang resources sa nasod aron mahimo kitang competitive. Mao usab kini ang tubag sa tumong sa presidente aron pagtuman sa iyang social contract tali sa katawhang Pilipino ug sa Labor and Employment Plan 2011-2016 nga nalangkob diha sa Philippine Development Plan 2011-2016. Ang maong plano naglaum sa inclusive growth nga makamugna ug daghang lokal nga trabaho, malahutayong ekonomiya ug pagnegosyo, magmugna ug disenteng trabaho, ingon man mopagahom sa katawhan aron pagbuntog sa kawad-on. (ALT/PCOO/PIA9-Zambo Sur)
|
