ni Alfonso T. Ruda
DIPOLOG CITY, DEC. 27(PIA)--- Gihingusgan karon sa Philippine National Police ang ilang kampanya batok sa illegal firecrackers sa tibuok nasod.
Kasunod niini, subling gipahinumdoman ni PNP Chief Director-General Nicanor Bsrtolome ang tanang PNP Unit Commanders kabahin sa iyang naunang direktiba nga nagmando kanila paggukod sa illegal nga paghimo, pagbaligya ug paggamit sa ginadiling paboto ug uban pang matang sa pyrotechnic devices.
Matod pa ni Bartolome, gisuportahan sa PNP ang “Iwas Paputok” Campaign sa nasudnong kagamhanan nga nagtumong nga mamenusan ang gidaghanon sa mga namatay ug nasamad gumikan sa paboto panahon sa Pasko ug Bag-ong Tuig.
Midugang pa si Bartololome, nga higpit nilang ipatuman ang kampanya batok sa illegal nga paboto ingon man ang pagpaboto ug armas atol sa pagsugat sa Bag-ong Tuig.
“Panahon na karon aron makakat-on kitag leksyon sa dinaghag nga pagpaboto panahon sa pasko ug dili lang kay ibaliwala ang mga pahimangno ug pasidaan sa gobyerno, may kalabutan niini,” matod pa ni Bartolome, “ uban ang pag-ingon nga gawas sa pagpaboto, duna pa gihapoy laing matang sa pagsugat sa bag-ong tuig.”
Ang pasidaan sa liderato sa PNP gidasonan usab sa tigpamaba sa PNP nga si Chief Supt. Agrimero Cruz Jr.
Gihatagan ug punto ni Cruz ang mahinungdanong probisyon sa Akta Repbulika No. 7183 nga nag-regulate sa paghimo, pagbaligya ug paggamit sa paboto ug uban pang matang sa pyrotechnic devices panahon sa Pasko ug Bag-ong Tuig.(ATR/PIA9-Zambo Norte)
