ni Alfonso T. Ruda
DIPOLOG CITY, DEC. 30(PIA)--- Ang Department of Social Welfare and Development mopalapad sa implementasyon sa ilang programa batok sa kapobrehon nga tinukmod sa panginahanglan sa komunidad ngadto sa 129 ka mga bag-ong lugar sunod tuig.
Gumikan niini, ang Kapit-Bisig Laban sa Kahirapan-Community Integrated Delivery of Social Services (KALAHI-CIDSS) mosakop na sa 348 ka mga munisipalidad, lakip na ang 48 ka mga lalawigan nga una nang nasakop sa maong programa.
Kini naglakip sa bag-ong nailang mga lalawigan sama sa Agpayao, Palawan, Antique, Aklan, Guimaras, ug Negros Oriental. Gibase kini sa 2006 National Statistics Coordination Board’s “Ranking on the Poorest Provinces Based on Poverty Incidence among Families.”
Matod pa ni DSWD Sec. Corazon “Dinky” Soliman, “Gusto namo ang aktibong kalambigitan sa katawhan sa pagpakigbatok sa kapobrehon sa ilang tagsa-tagsa ka komunidad pinaagi sa nasulayan nang community-driven development (CDD) nga paagi sa KALAHI-CIDSS nga maoy nagpahimong kampeyon sa “participatory governance” nga nagresulta sa paglambo sa kinabuhi sa katawhan.
Ang gipalapad nga lugar gipondohan sa dugang loan nga 59.12 milyones dolyares gikan sa WorldBank; 120 milyones nga grant gikan sa Millenium Challenge Corporation; ug complementary grants gikan sa Australian Agency for International Development ug Office of the Presidential Adviser on the Peace Process.
Ang CDD nga paagi nga nasulayan ug napamatud-an nga epektibong hinagiban sa pagpakiggubat sa kapobrehon sa mga kabus nga lalawigan, nagtumong sa paghatag ug gahum sa katawhan nga direktang mosalmot sa lokal nga pangagamhanan pinaagi sa pag-ila sa pangihanglan sa ilang komunidad; pagplano; pag-implemntar ug pagmonitor sa mga proyektong gipatuman isip tubag sa problema sa kapobrehon.
Ang proseso sa pagplano nga dunay partisipasyon ang katawhan nagtumong aron masiguro nga ang mga membro sa komunidad, ilabi na ang mga kabus nga malambigit sa pag-analisar sa sitwasyon ug pagplano aron maandam ang Barangay Action Plan nga magsilbing kahimanan sa himoong Local Municipal Action Plan sa lungsod.
Ang external economic analysis nagbutyag nga ang partisipasyon sa komunidad nakamenus sa gasto ug naka-improve sa kalidad sa proyekto.
Ang mga inprastaktura sa komunidad nga gipondohan sa KALAHI-CIDSS napamatud-ang mas ubos kaysa nga wala maglambigit sa mga proyekto sa CDD nga naggikan sa 8 ka porsientong mga lawak tunghaan ug 30 porsiento sa power supply.
Ang proseso naghatag usab ug kahigayonan sa komnunidad nga ilhon ang ilang panginahanglan; paglano; pagdevelop; pag-implementar, pagdumala ug pagpadayon sa kalambuan nga ilang nasugdan.
Ang KALAHI-CIDSS funding requirement nga kuhaon gikan sa 20-porsiento nga development fund sa munisipyo magsiguro usab nga tukmang bahin sa maong pondo gamiton para sa nag-unang panginahanglanon sa kabus nga mga komunidad.(ATR/PIA9-Zambo Norte)
