DIPOLOG CITY, DEC. 27(PIA)---Sa tinguhang mailhan ug masanta ang pagdagsang sa mga nagpaka-aron-ingnong mga biktima sa bagyong si Sendong, manghatag ang Department of Social Welfare and Development (DSWD) ug family access cards sa mga residenteng apektado sa nasangpit nga bagyo.
Matod pa ni DSWD Sec. Corazon “Dinky” Soliman, ang family access cards ihatag niadtong mga pamilya nga na-interview ug napamatud-ang matuod nga biktima sa bagyong si Sendong.
“Ipanghatag namo ang family access cards aron magmatuod nga ang naghupot niini matuod gyung apektado ni Sendong,” matod pa ni Soliman.
Ang record nga nakuha gikan sa National Disaster Risk Reduction Management Council(NDRRMC) nagpakita nga hangtud niadtong alas 6 ang takna sa hapon, kagahapon (Disyembre 26), miabot na sa 110,806 ka mga pamilya nga dunay 695,195 ka membro gikan sa 789 ka mga barangays sa 58 ka mga lungsod, 8 ka siyudad ug 13 ka mga probinsiya ang apektado sa bagyong si Sendong. Niining maong gidaghanon, 12,052 ka pamilya kon 60, 430 ka mga tawo ang nagpabilin pa sa mga evcacuation centers.
Matod pa ni Soliman, 16,9080 ka pamilya ang apektadoi sa dakbayan sa Iligan.
Ang dakbayan sa Iligan ug Cagayan de Oro mao ang mga lugar nga nakaangkon ug dakong kadaot gumikan sa bagyong si Sendong.
Hinuon, matod pa ni Soliman, iyang nasabtan ang rason kon dunay mga apektado ang mas gusto pang magpuyo sa laing balay kay sa evacuation centers.
Matod pa ni Soliman, usa sa mga evacuation center sa Cagayan de Oro dunay 600 ka pamilya apan miabot pa sa 3,00 ka pamilya ang nangayo ug hinabang gikan sa gobyerno.
“Ang DSWD padayong makig-coordinate sa mga kagamhanang–lokal sa paghatag ug hinabang sa mga apektado sa bagyo,” matod npa ni Soliman,(ATR/PIA9-Zambo Norte)
