ni Alfonso T. Ruda
DIPOLOG CITY, NOV. 12(PIA)--- Andam si Justice Secretary Leila De Lima nga pamatud-an nga legal ang gimugnang Department of Justice-Commission on Election Investigating Team.
Gipalanog ni De Lima ang pasalig human si kanhi Unang Ginoo Mike Arroyo miduso ug petisyon sa Korte Suprema nga nangayong ideklarar nga supak sa konstitusyon ang gimugnang DOJ-COMELEC Panel.
Gipahayag usab sa kalihim sa DOJ nga andam niyang tubagon ang petisyon sa kanhing Unang Ginoo sa tukmang panahon.
Dugang pa ni De Lima, nga nangandam siya karon sa iyang depensa sa Watch List Order nga iyang giisyo batok sa magtiayong Mike ug Gloria Arroyo.
Mahinumdoman, nga kagahapon, giduso ni Mike Arroyo sa korte suprema ang patisyon nga nangayong ibasura ang DOJ-COMELEC Joint Order No. 001 nga nagmugna sa DOJ-COMELEC Fact-Finding Team ug Preliminary Investigating Panel.
Ang nasangpit nga panel gitahasan nga magpahigayon ug imbestigasyon sa electoral sabotage nga gipasaka batok sa kanhi Presidente ug karon Representante sa Ikaduhang Distrito sa Pampanga nga si Gloria Macapagal-Arroyo, iyang bana ug 37 pang uban gumikan sa giingong ilang kalambigitan sa pagmanipula sa resulta sa piniliay pagkasenador niadtong 2007.
Sa 65-ka pahinang petition for certiorari and prohibition with a prayer for temporary restraining order nga giduso ni Arroyo pinaagi sa iyang abogado nga si Atty. Ferdinand Topacio, gibarugan niini nga unconstitutional ang DOJ-COMELEC Fact-Finding Team. (JPA/ATR/PIA9-Zambo Norte)
