ni Alfonso T. Ruda
DIPOLOG CITY, NOV. 12(PIA)--Magpabilin gihapon naka red alert ang tagsa-tagsa ka mga kampo sa Armadong Kusog sa Pilipinas ug Philippine National police samtang libreng motan-aw sa away ni Pound-for-Pound King Manny Paquiao batok sa Mexicanong 3-time World Champion nga si Juan Manuel Marquez ugma, Nobyembre 13.
Sumala pa sa mga opisyales sa AFP ug PNP ang away ni Paquiao ug Marquez libreng matan-aw sa AFP General Headquarters Gym ug AFP Grandstand sa Camp Aquinaldo sa Quezon City; Philippine Air Force Headquarters Gym; Philippine Army Gym ug Grandstand sa PA Headquarters sa Taguig City; Phil. Navy Gymnasium sa PN Headquarters ug Fort Bonifacio General Hospital ug PA Headquarters usab sa Taguig City.
Bisan ang mga samarong mga sundalo nga naka-confine sa mga tambalanan sama sa AFP Medical Center sa V Luna St., sa Diliman, ug mga biktima sa gubat duna usay kahigayonan nga makakita sa away ni Paquiao ug Marquez sulod sa AFPMC Medical Auditorium.
Gibana-banang dili momenus 2,000 ka tawo ang mosaksi sa maong away sa GHQ Grandstand. Pagalangkuban kini sa mga military personnel, civilian employees ug military dependents. Usa ka libo ka tawo usab ang gilaumang mosaksi niini sa V-Luna Medical Center.
Ang PN ug PAF parehong nagpaabot ug 1 ka libo nga motan-away sa maong away. Ang PA nag-andam sa ilang gym alang sa 3 mil ka tawo; samtang 300 ang gilauman sa Fort Bonifao General Hospital ug laing 3 mil sa PA Grandstand.
“Ang atong mga duty soldiers dili lakip sa matan-aw sa away ni Paquiao ug Marquez aron padayong motuman sa ilang katungdanan sa pagmintinar sa kahusay ug kalinaw ug istabilidad sa nasod. Bisan ug niadtong miaging away ni Paquiao, dunay pipila ka mga insidente sa kagubot, padayon gihapong magbantay ang mga sundalo ug makig-koordinasyon sa PNP aron masiguro ang kahusay ug kalinaw sa nasod sa maong adlaw,” matod pa ni AFP Chief Gen. Eduardo Oban Jr. (JPA/ATR/PIA9-Zambo Norte)
