ni Alfonso T. Ruda
DIPOLOG CITY, NOV. 10 (PIA) -- Duna pa gihapoy kahigayonan ang 5,102 ka mga kabus nga pamilya sa Zamboanga del Norte nga malakip sa bag-ong talaan sa mga benepisyaryo sa Pantawid Pamilyang Pilipino Program(4Ps) dinhi sa lalawigan nga wala makatungha sa naunang gipahigayon nga registration ug revalidation niadtong Nobyembre 3 ngadto sa 7.
Kini human nga gilugwayan sa Departament of Social Welfare and Development hangtud ugmang adlawa (Nobyembre 11) ang registration ug revalidation sa natumbok nga benepisyaryo sa 4Ps gikan sa 13 ka mga lungsod sa lalawigan.
Matod pa ni Jose Cruz, Provincial Link sa 4Ps dinhi sa Zamboanga del Norte, 22,891 ka pamilya sa 13 ka mga munisipyo ning lalawigan, kwalipikado pang makapahimulos sa maong programa.
Apan niining maong gidaghanon, matod pa ni Cruz, sa 12 ka mga munisipyo nga nagpatawag ug Community Assembly alang sa maong katuyoan, 21,705 lang ka pamilya ang napamatud-ang kwalipikadong makapahimulos sa 4Ps ug 1,186 ka mga pamilya ang natangtang sa listahan gumikan sa nagkalain-laing katarungan.
Ang lungsod sa Sibuco nga dunay 3,831 ka pamilyang posibling makapahimulos sa 4Ps nagpahigayon pa lang sa ilang registration ug revalidation activity gikan niadtong Nobyembre 8 hangtud sa 11.
Pipila sa katarungan sa pagkadiskwalipika sa 1,186 ka potensyal nga benepisyaryo sa 4Ps mao ang sayop nga pagkalakip sa programa (69); mibalibad pagpahimulos sa programa(34); dobleng mga entry(546); wala nay anak nga ubos sa 14 anyos(117); mibalhin ug pinuy-anan(304); ug wala mailhi,116 ka pamnilya.(JPA/ATR/PIA9-Zambo Norte)
