ni Alfonso T. Ruda
DIPOLOG CITY, NOV. 10(PIA) -- Kapin kon kulang 11 mil ka mga nars ang hatagan ug trabaho sa Department of Health karong bulana isip suporta sa gobyerno niadtong gustong mogawas sa nasod aron manarbaho.
Mao kini ang gipahibalo ni DOH Assistant Secretary, Dr. Nemesio Gako atol sa gipahigayong 6th Asia-Pacific Action Alliance on Human Resource for Health Annual Conference nga nagsugod niadtong Miyerkules ug matapos sa Biyernes.
Matod pa ni Gako, kadtong mga nars nga gustong manarbaho sa gawas sa nasod mahimong magtrabaho ilalom sa Registered Nurses for Health Enhancement and Local Services Program aron makakuha ug kasinatian.
Dugang pa ni Gako, ang usa ka tuig nga pagtrabaho sa usa ka nars ilalom sa RN HEALS Program, makonsidera nang kasinatian sa trabaho, nga usa sa mga rekistos sa pagpanarbaho sa ubang nasod.
Sa pagkakaron miabot na sa 10 mil na ka mga nars ang na-hire sa DOH sulod sa usa ka tuig sa maong programa.
Ang ikaduhang hugna sa bag-ong makasulod sa RN HEALS pagalangkuban sa 11,500 ka mga nars ug 1 ka libo ka mga midwives kon mananabang.
Ang mga nars ipadala sa mga lugar nga dunay daghang benepisyaryo sa Pantawid Pamilyang Pilipino Program sa Department of Social Welfare and Development ug magtrabaho sa maong dapit sulod sa usa ka tuig.
Matod pa ni Gako ang mga nars nga magtrabaho ilalom sa RN HEALS dunay suweldo nga 8 mil matag bulan uban ang libreng health insurance.
Ang pahibalo ni Gako gihimo taliwala sa taho sa kakulangan sa nars ug dili balanseng pag-apod-apod sa mga nars sa rehiyon sa Asya-Pasipiko.
Ang Pilipoinas mao ikatulong nasod sa Asya Pasipiko kon maoy basehan ang mga nars nga nanarbaho sa ubang mga nasod. (JPA/ATR/PIA9-Zambo Norte)
