Walay imposibleng dili makab-ot sa nasod nga nagkahiusa, matod pa ni Pres. Aquino

Ni Alfonso T. Ruda

DIPOLOG CITY, JULY 25(PIA)--- Si Presidente Benigno Aquino III nagkanayon nga walay butang nga dili makab-ot ang usa ka nasod kang kansang katawhan nagkahiusa ug nagpakabana sa usag-usa ug kanunayng nagpaluyo sa ilang gobyerno nga kanunayng nagduso ug mga repormang gilaumang magresulta sa mas maayo ug malambuong nasod.

Dungan niini, padayon usab nga naningkamot ang Kagamhanang-Aquino nga ipatuman ang mga reporma ug kalambuan sa natad sa panglawas, edukasyon, ekonomiya, agrikultura, enerhiya, kahusay ug kalinaw, turismo ug pagmugna ug trabaho.

Sa iyang ikatulong State of the Nation Address sa hiniusang sisyon sa 15^th Congress, sa Session Hall sa House of Representatives Complex, Constitution Hills, Quezon City niadtong Hulyo 23, 2012(Lunes), si Presidente Aquino nagkanayon nga pinaagi sa sinsero ug kinasing-kasing nga serbisyo-publiko ug suporta gikan sa katawhan, dili halayo nga makab-ot sa gobyerno ang gidamgo niining mahimo ang iyang nasod nga usa sa labing maayong nasod sa rehiyon.

“Kini ang akong nakat-onan sulod 25 ka bulan nga nahimo akong inyong Pangulo. Walay imposible. Walay imposible tungod kay makita man sa katawhang Filipinhon nga sila ang agalon sa  kagamhanan, alsahon ka nila, agakon ka nila, sila mismo ang mangulo padulong sa makahuluganong kausaban,” matod pa ni Presidente Aquino.

“Dili imposible sa Pilipinas nga mobarog ug moingon, Ang Pilipinas para sa mga Filipino ug andam kining panalipdan kami. Dili imposible nga ang Filipino nga sa dugay nang panahon moduko lang ug makahinagbo ug langyaw, karon ang Filipino, taas na ang agtang ug giila sa tibuok kalibutan,” midugang pa ang Presidente.

“Nindot kaayong mahimong Filipino niining panahon,” matod pa niya.

Gipasalamatan usab sa Presidente ang nagkalain-laing grupo ug mga tawong wala batiag kakapoy nga makigtrabaho uban sa gobyerno ug masiguro nga mahatagan ug katumanan ang gidamgo niini.

“Dili tiaw-tiaw ang mga pagsulay nga atong giagian, mao nga angayan lamang nga atong pasalamatan ang mga tawong nakigtambayayong sa pag-ayo sa kadaot nga bunga sa di-maayong pangagamhanan. Sa tanang mga membro sa akong gabinete, daghan, daghan kaayong salamat,” matod pa ni Presidente Aquino.

Giila usab sa Presidente ang kooperasyon sa mga Filipino, uban ang pag-ingon nga ahimong possible ang mga imposible gumikan sa ilang suporta.

“Miatubang ako kaninyo isip usa ka nawong sa gobyerno nga kamo ang amo ug kamo ang akong kusog. Gitaho lang nako ang mga kausaban nga nahimong possible tungod kaninyo,” midugang pa siya.

“Akong sublion, nga possible na ang kanhing imposible. Miatubang ako kaninyo karon ug moingon nga dili kini akong SONA, kamo ang naghimo niini. SONA kini sa katawhang Filipinhon,” matod pa ni Presidente Aquino.(ATR/PCOO/PIA9-Zambo Norte)