ni Franklin P. Gumapon
DIPOLOG CITY, July 7 (PIA) - - Daku ang paglaum sa
Palasyo nga ang pagpahigayon sa Bangsamoro general assembly sugod ning adlawa hangtud
sa Lunes mosamput sa usa ka kasabutan alang sa kalinaw tali sa Moro Islamic
Liberation Front (MILF) ug sa kagamhanang Aquino.
Ang maong panagtigum sa may 500,000 ngadto sa usa ka
milyon nga mga sakop sa MILF ipahigayon didto sa Camp Darapanan, Sultan
Kudarat, Maguindanao.
Mga representate sa Organization of Islamic
Conference (OIC) ug ubang international organizations gilauman usab nga
motambing sa maong panagtigum.
Matud pa ni Sekretaryo Ging Deles, ang maong
kalihukan usa ka maayong lakang aron sa pagpalig-on sa suporta sa mga MILF
tumong sa usa ka kasabutan alang sa kalinaw.
Si Presidential Spokesperson Edwin Lacierda naglaum
nga matawo na ang kasabutan alang sa kalinaw tali sa kagamhanan ug MILF sulod
sa kasamtangang pamunu-an.
Ang katuyu-an sa maong asembliya sa MILF mao ang
pag-aghat sa mga sakop niini sa pag-suporta sa ilang mga baruganan alang sa
kalinaw.
Ang MILF nakigbisog batok sa kagamhanan sa sulod 30
ka tuig na karon nga mikalas na sa may 50,000 ngadto sa 60,000 ka mga kinabuhi.
Kahinumduman nga sa iyang paglingkod isip Pangulo
Nasud, gipadayag ni Pangulong Aquino ang iyang tinguha nga ipadayon ang
panagsabot tali sa kagamhanan ug sa MILF aron makab-ot ang usa ka kasabutan
alang sa kalinaw sulod sa iyang pamunuan. (FPG/PCOO/PIA-Zamboanga del Norte)