DIPOLOG CITY, JULY
16(PIA)---Gihupay
karon sa Malakanyang ang kahadlok sa publiko nga posibling gamiton sa mga local
nga politiko sa ilang politikanhong interes sa umaabot nga piniliay sa 2013 ang
Conditional Cash Transfer Program nga gipatuman sa administrasyong Aquino.
Ang
usa ka opisyal sa simbahan unang mipasidaan nga ang CCT program mahimong gamitong
politikanhong kahimanan sa pipila ka mga lokal nga politiko sa ilang pagpapili
karong lokal nga piniliay sa 2013.
Sa
usa ka pakighinabi sa radyo, gipahayag ni Deputy Presidential spokesperson
Abigail Valte nga ang mga lokal nga lider labot sa pag-implementar ug pagpili
sa mahimong benepisyaryo sa CCT Program.
“Kana
ang sistema sa miaging administrasyon. Apan ilalom sa administrasyong Aquino, ang
mga benepisyaryo sa CCT Program nga mas naila isip Pantawid Pamilyang Pilipino
Program kon 4Ps gipili pinaagi sa National house Targeting System(NHTS). Gi-survey
na,” matod pa ni Valte.
“Dili
magamit sa piniliay sa 2013 tungod kay ang sistema nga among gidisenyo dili na
moagi sa mga lokal nga opisyal. Walay unsa mang “input” gikan sa lokal o
opisyal sa probinsiya kon kinsa ang angay nga malakip sa programa,” dugang pa
ni Valte.
Dugang
pang gipatin-aw ni Valte nga bisan ug irekomendar pa sa NHTS ang partikular nga
benepisyaryo, apan kon makita nga dili kini kwalipikado, tangtangon usab dyon
kini sa listahan.
Bisan
ug ang ensaktong natudlo sa NHTS nga kwalipikadong makabenepisyo sa programa,
kinahanglan gihapon silang mosunod sa mga rekisitos nga gitakda sa gobyerno.
Dihang
gipangutana kon unsa kasiguro nga dili ma-impluwensiyahan sa mga lokal nga politico
ang programa, gipahayag ni Valte nga ang programa dili perpekto apan gibutang
sa gobyerno ang mga panalipod aron malikayan ang pagpang-abuso ug dili tukmang
paggamit sa pondo alang sa CCT program.
“Kompiyansa
kami nga duna nay tukmang panalipod ang programa. Posibling dili perpekto ang National
Household targeting System, apan amo nang gipahimutang ang mga tukmang lakang
aron makuhaan ang kasaypanan nga nanghitabo,” nagkanayon si Valte.
Nagplano
ang administrasyong Aquino nga palapdan an sakop sa CCT Program aron pagkab-ot
sa malungtarong epekto sa programa sa gobyerno batok sa kapobrehon uban ang
paghangyo sa publiko nga hatagan ug igu-igong panahon ang programa aron mabati
ang epekto niini sa ilang kinabuhi.
Gilantaw
karon sa gobyerno ang pagsakop ug dugang benepisyaryo sa CCT karong tuiga gikan
sa 3.1 mnilyones ka pamilya ngadto sa 3.8 milyones ka pamilya sunod tuig.(ATR/PCOO/PIA9-Zambo Norte)-