DIPOLOG CITY, JULY
16(PIA)---Hugtanong
gipanghimakak sa Malakanyang ang pagsaway gikan sa pipila ka sektor nga wala
moagi sa tukmang konsultasyon ang Executive Order no. 79 sa wa pa pirmahi ni
Presidente Benigno Aquino III ang direktiba nga nagharmonize sa mga polisiya ug
gabayan sa pagmina sa nasod.
Sa
press briefing nga gipahigayon sa Malakanyang kagahapon, gipahayag ni Presidential
Communications Development and Strategic Planning Secretary Ramon Carandang, nga
ang tanang mga hingtungdan, mga non-governmental organizations, environmental
groups ug mga kagamhanang-lokal dunay representante sa diskusyon nga nagresulta
sa pagkatawo sa bag-ong Orden Ehikutibo sa pagmina.
Midugang
pa si Carandang nga usa sa mga hinungdan nga nalangan ang pormal nga
implementasyon sa bag-ong Mining EO niadtong Hulyo 9, tungod kay miagi pa kini
sa tukmang konsultasyon sa mga hingtungdan.
“Busa
dunay tukmang konsultasyon kabahin sa Mining EO ug nagtoo ako nga sa kinatibuk-an,
ang tanang rasonabling mga stakeholders sa pagmina nagkauyon nga tingali, bisan
sa ilang panglantaw, dili kini ideal apan mahimo nang madawat sa kadaghanan sa
mga stakeholders,” matod pa ni Carandang.
Gihatagan
ug punto ni Carandang nga balanse ang bag-ong Mining EO taliwala sa paglambo sa
industriya sa pagmina nga dili kaayo dakong epekto niini sa palibot o
kinaiyahan.
Kini
ang EO nga among gitoohan nga balanse taliwala sa nagkalain-laing interes sa
nasod,” matod pa ni Carandang.
Ang
EO 79 miila sa mga lugar nga sirado sa aplikasyon sa pagmina, ma-kontrata man,
concession o kasabutan; lakip na ang mga lugar nga nasulod sa National Tourism
Development Plan; critical areas; ug island eco-systems; prime agricultural
lands nga sakop sa RA 6557; strategic
agriculture and fisheries development zones of fish refuge sanctuaries nga gideklarar
sa Department of Agriculture. Ang pagmina wala gitugot sa mga lugar nga una
nang giila sa kasamtangang balaod sa pagmina; agrarian reform ug mga protected
areas, ingon man mga lugar nga gitumbok sa Department of Environment and
Natural Resources (DENR).
Ang
kamanduan sa Presidente gipasikad sa hiniusang resolusyon sa Cabinet Cluster on
Climate Change Adaptation and Mitigation ug Economic Development nga pinitsahan
ug Marso 16, 2012. Kini nagtumong nga mapalambo ang environmental mining
standards ug pagdugang sa abot sa gobyerno aron ma-promote ang malungtarong
kalambuian ug katilingbanong pag-uswag sa nasudnon ug lokal nga kagamhanan. (ATR/PCOO/PIA9-Zambo Norte).