ni Alfonso T. Ruda
DIPOLOG CITY, JUNE
21(PIA)--- Subay sa
job-generation program ni Presidente Benigno Aquino III, ilalom sa iyang social
contract uban sa katawhang Filipinhon, gibutyag sa Technical Education and
Skills Development Authority ang padayong implementasyon sa TESDA On Line Program
nga nagtanyag ug pagbansay-bansay sa kinsa mang intresadong individual bisan
asa ug bisan kanus-a sa ubos lang kaayong bayronon.
Sa
iyang report kang Presidente Aquino, si TESDA Director-General Joel Villanueva nagkanayon nga sa pagkakaron, duna
nay 19,968 ka mga rehistradong naggamit sa TESDA On Line Program sukad nga
gilusad kini niadtong Mayo ug nakakuha na ug 553,583 ka mga page views kon
pahinang natan-aw.
Midugang
pa si Villanueva nga ang mga nakatapos sa TOP nakasulod na ug trabaho ug
nakahatag na ug maayong kalidad sa kinabuhi sa ilang pamilya.
Si
TESDA “Specialista” Gricelle Claveria, nga mikuha ug Computer Hardware
Servicing NC II on line nagtrabaho na karon didto sa Singapore. Matod pa ni Claveria,
ang programa naghatag kaniya ug tukmang kahibalong-teknikal nga naghatag
kaniyag bentaha sa iyang nasudlang trabaho.
Laing
TESDA Specialista nga si Jonathan Lozano nga
usa kanhi ka sales promoter, nakaangkon na usab ug desenting trabaho isip laptop
ug computer technician human nga nakatapos ug on line course ug nakapasar sa
national competency assessment.
Sa
pagkakaron, upat(4) ka on line courses an bakante ilalom sa TOP. Kini mao ang
Computer Hardware Servicing NC II, Room Attendant Servicing NC II, core competency
sa Housekeeping NC II, ug Cellphone Servicing nga mao ang usa sa mga
competencies sa Consumer Electronics Servicing NC II.
Matod
pa ni Villanueva, target karon sa administrasyong Aquino ang kinatibuk-ang
napulo(10) ka kurso isip tipik sa padayong pagpalambo sa on line education
program.(ATR/PCOO/PIA9-Zambo Norte)
